സുരേഷ്‌ഗോപിക്ക് നാളെ തൃശ്ശൂരില്‍ സ്വീകരണം

തൃശ്ശൂര്‍: കേന്ദ്രമന്ത്രിയായി ചുമതല ഏറ്റെടുത്ത സുരേഷ്‌ഗോപി നാളെ തൃശ്ശൂരിലെത്തും. തൃശ്ശൂര്‍ റെയില്‍വേ സ്റ്റേഷനില്‍ ബിജെപി ജില്ലാ കമ്മിറ്റിയുടെ നേതൃത്വത്തില്‍ പൗരാവലി വന്‍ സ്വീകരണമാണ് അദ്ദേഹത്തിനായി ഒരുക്കിയിട്ടുള്ളത്. വൈകിട്ട് 6ന് വന്ദേഭാരത് എക്‌സ്പ്രസില്‍ തൃശ്ശൂര്‍ റെയില്‍വേ സ്റ്റേഷനിലെത്തുന്ന സുരേഷ് ഗോപിയെ ജില്ലാ, സംസ്ഥാന നേതാക്കള്‍ ചേര്‍ന്ന് സ്വീകരിക്കും. തുടര്‍ന്ന് രാമനിലയത്തിലേക്ക് പോകും.

രാത്രി 8ന് വടക്കുന്നാഥ ക്ഷേത്രത്തില്‍ ദര്‍ശനം നടത്തും. നാളെ രാവിലെ 9ന് ഗുരുവായൂര്‍, 11ന് പാവറട്ടി, വൈകിട്ട് 4ന് നാട്ടിക, 6ന് ഇരിങ്ങാലക്കുട മണ്ഡലങ്ങളില്‍ സ്വീകരണ യോഗങ്ങളില്‍ പങ്കെടുക്കും. 15ന് രാവിലെ 9ന് പുതുക്കാട്, 11ന് പീച്ചി, വൈകിട്ട് 4ന് തൃശ്ശൂര്‍ മണ്ഡലങ്ങളില്‍ സ്വീകരണമുണ്ടാകും. കേന്ദ്ര പെട്രോളിയം, ടൂറിസം വകുപ്പുകളുടെ സഹമന്ത്രിയാണ് സുരേഷ് ഗോപി.