തൃശൂര്‍: വനിതാ ഡോക്ടറെ ഭീഷണിപ്പെടുത്തി സ്വര്‍ണവും പണവും തട്ടിയെടുത്ത യൂട്യൂബര്‍ അറസ്റ്റില്‍. ‘ഫുഡി മേനോന്‍’ എന്നറിയപ്പെടുന്ന എറണാകുളം കടവന്ത്ര കാടായിക്കല്‍ ജയശങ്കര്‍ മേനോനെയാണ് ഈസ്റ്റ് പോലീസ് പിടികൂടിയത്. ഏഴ് ലക്ഷത്തിലധികം രൂപയും സ്വര്‍ണവും തട്ടിയെടുത്തെന്ന തൃശൂര്‍ സ്വദേശിനിയായ ഡോക്ടറുടെ പരാതിയിലാണ് അറസ്റ്റ്.
അഭിഭാഷകന്‍ കൂടിയായ ഇയാള്‍ സോഷ്യല്‍ മീഡിയയില്‍ ശ്രദ്ധേയനായ ഫുഡ് വ്‌ലോഗര്‍ ആണ്. ഇരുവരും തമ്മിലുള്ള സെല്‍ഫി ഫോട്ടോ ഇന്‍സ്റ്റഗ്രാമില്‍ പങ്കുവയ്ക്കും എന്ന് ഭീഷണിപ്പെടുത്തി പലതവണയായി 7 ലക്ഷത്തിലധികം രൂപ തട്ടിയെടുത്തുവെന്നാണ് വനിത ഡോക്ടറുടെ പരാതി. യുവതിയുമായുള്ള സൗഹൃദം മുതലെടുത്തായിരുന്നു തട്ടിപ്പ്. കഴിഞ്ഞ വര്‍ഷം ജനുവരി 14 മുതല്‍ !ഡിസംബര്‍ 30 വരെ പ്രതി യുവതിയെ നിരന്തരം ഭീഷണിപ്പെടുത്തിയിരുന്നു.
ബാങ്ക് വഴിയാണ് പ്രതി 7,61,600 രൂപ കൈപ്പറ്റിയിട്ടുള്ളത്. പരാതിക്കാരിയുടെ ബാങ്ക് കാര്‍ഡ് വാങ്ങിയും പ്രതി പണം വലിച്ചതായി പൊലീസ് പറഞ്ഞു. ഇത് കൂടാതെ 30 പവനോളം സ്വര്‍ണവും ഇയാള്‍ പരാതിക്കാരിയില്‍ നിന്നും തട്ടിയെടുത്തിട്ടുണ്ട്. ‘ഫുഡി മേനോന്‍’ എന്ന പേരില്‍ സോഷ്യല്‍ മീഡിയ പ്ലാറ്റ്‌ഫോമുകളിലെ ഫുഡ് വ്‌ലോഗുകളിലൂടെ പരിചിതനായ ഇയാളെ ലക്ഷക്കണത്തിനു ആളുകളാണ് ഫോളോ ചെയ്യുന്നത്.
പ്രതികരിക്കാൻ ഇവിടെ എഴുതുക: