വൈപ്പിനിൽ വനിതാ ഓട്ടോ ഡ്രൈവർക്ക് ക്രൂരമർദ്ദനം

കൊച്ചി: വൈപ്പിൻ കുഴിപ്പിള്ളിയിൽ വനിത ഓട്ടോ ഡ്രൈവർക്ക് മർദനമേറ്റതായി പരാതി. വൈപ്പിൻ പള്ളത്താംകുളങ്ങരയിലെ ഓട്ടോ ഡ്രൈവർ ജയയ്‌ക്കാണ് ക്രൂരമായി മർദനമേറ്റത്. ഇന്നലെ രാത്രിയോടെയായിരുന്നു ദാരുണമായ സംഭവം. ഓട്ടോ സവാരിയ്‌ക്ക് വേണ്ടി വിളിച്ച യുവാക്കളാണ് യുവതിയെ മർദിച്ചതെന്ന് പൊലീസ് അറിയിച്ചു. മർദനത്തിൽ ഗുരുതരമായി പരിക്കേറ്റ ജയ നിലവിൽ ചികിത്സയിലാണ്.

ഓട്ടോയിൽ കയറിയ 3 യുവാക്കളാണ് ജയയെ മർദിച്ചതെന്ന് സഹോദരി പറഞ്ഞു. കളമശ്ശേരി മെഡിക്കൽ കോളേജിലേക്ക് പോകണമെന്നു പറഞ്ഞാണ് മൂവരും ഓട്ടോയിൽ കയറിയത്. കുഴുപ്പിള്ളിയിൽ നിന്നാണ് ഓട്ടോ വിളിച്ചത്. കളമശ്ശേരി മെഡിക്കൽ കോളേജിൽ എത്തിയ ശേഷം അവിടെ നിന്ന് തിരിച്ച് കുഴുപ്പിള്ളിയിലെത്തിയ ശേഷമാണ് യുവാക്കൾ മർദിച്ചത്.

പ്രദേശവാസികളാണ് അവശനിലയിലായ ജയയെ ആശുപത്രിയിലെത്തിച്ചത്. മർദനത്തിൽ വാരിയെല്ലുകൾ ഒടിഞ്ഞതുൾപ്പടെ ജയയ്‌ക്ക് ഗുരുതരമായി പരിക്കേറ്റിട്ടുണ്ടെന്നും സഹോദരി പറഞ്ഞു.