ആലപ്പുഴ: ഓടുന്ന കാറില് സ്വിമ്മിംഗ് പൂള് സജ്ജമാക്കി കുളിച്ച് യൂട്യൂബിലൂടെ പ്രദര്ശിപ്പിച്ച സഞ്ജു ടെക്കി എന്നറിയപ്പെടുന്ന സജു ടി എസിന്റെ ലൈസന്സ് ആജീവനാന്തം റദ്ദാക്കാന് സാധ്യത. തുടര്ച്ചയായ നിയമലംഘനങ്ങളുടെ പശ്ചാത്തലത്തിലാണ് നടപടി സ്വീകരിക്കുക എന്നാണറിയുന്നത്.
തിങ്കളാഴ്ച ആലപ്പുഴ എന്ഫോഴ്സ്മെന്റ് ആര്ടിഒയ്ക്ക് മുന്പാകെ ഹാജരായ സജു ടി എസും രണ്ട് സുഹൃത്തുക്കളും ആലപ്പുഴ മെഡിക്കല് കോളേജില് നിര്ബന്ധിത സേവനം തുടങ്ങി.
നിരന്തരമായി മോട്ടോര് വാഹന നിയമലംഘനം നടത്തുന്ന ആളാണ് സഞ്ജു ടെക്കി എന്ന റിപ്പോര്ട്ട് മോട്ടോര് വാഹന വകുപ്പ് ഹൈക്കോടതിക്ക് കൈമാറിയിരുന്നു.നടപടിയെടുത്തതിനെ തുടര്ന്ന് എംവിഡിയെയും മാധ്യമങ്ങളെയും പരിഹസിച്ച് സഞ്ജു ടെക്കി യൂട്യൂബ് വീഡിയോ പോസ്റ്റ് ചെയ്തത് ശ്രദ്ധയില്പ്പെട്ടതോടെയാണ് ഹൈക്കോടതി എംവിഡിയോട് റിപ്പോര്ട്ട് ആവശ്യപ്പെട്ടത്.
17കാരനെ കൊണ്ട് വാഹനം ഓടിപ്പിച്ചതിന് സഞ്ജു ടെക്കിക്കെതിരെ നിലവില് കേസുണ്ട്.160 കിലോ മീറ്റര് വേഗത്തില് ഡ്രൈവിംഗ്, മൊബൈലില് ഷൂട്ട് ചെയ്തുള്ള ഡ്രൈവിംഗ്, ആഡംബര വാഹനങ്ങള് രൂപമാറ്റം വരുത്തി നിരത്തിലിറക്കി തുടങ്ങി നിരവധി നിയമലംഘനങ്ങള് യുട്യൂബ് ചാനലില് ആര്ടിഒ നടത്തിയ പരിശോധനയില് കണ്ടെത്തിയിരുന്നു.
തുടര്ന്ന് കാരണം കാണിക്കല് നോട്ടീസ് എം വി ഡി സഞ്ജു ടെക്കിക്ക് കൈമാറി. വിശദീകരണം നല്കാന് ഏഴുദിവസം സമയം അനുവദിച്ചിട്ടുണ്ട്.
എം വി ഡി നിര്ദ്ദേശിച്ച പ്രകാരം സഞ്ജു ടെക്കിയും ഓടുന്ന വാഹനത്തിലെ സ്വിമ്മിംഗ് പൂളില് കുളിച്ച മറ്റ് രണ്ട് സുഹൃത്തുക്കളും ആലപ്പുഴ മെഡിക്കല് കോളജില് ഇന്നുമുതല് 15 ദിവസത്തെ നിര്ബന്ധിത സേവനം ആരംഭിച്ചു. അതേസമയം എം വി ഡി കൈമാറിയ റിപ്പോര്ട്ട് ഈ മാസം 13ന് ഹൈക്കോടതി പരിഗണിക്കും.
