ന്യൂദല്ഹി: ബിജെപി നേതൃത്വത്തിലുള്ള എന്ഡിഎയെ സർക്കാർ രൂപീകരിക്കാൻ ക്ഷണിച്ച് രാഷ്ട്രപതി ദ്രൗപദി മുര്മു. നേരത്തെ രാഷ്ട്രപതിയ് കണ്ട് സര്ക്കാര് രൂപീകരിക്കാൻ മോദി അവകാശവാദം ഉന്നയിച്ച് കത്ത് നൽകിയിരുന്നു. പുതിയ സര്ക്കാരിന്റെ സത്യപ്രതിജ്ഞ ഞായറാഴ്ച നടക്കുമെന്ന് മോദി പറഞ്ഞു. ആഹ്ളാദത്തിന്റെ പ്രതീകമായി മധുരമുള്ള തൈര് (ദഹി ചീനി) രാഷ്ട്രപതി മോദിയ്ക്ക് നല്കി.
ബിജെപി അംഗങ്ങളുടെയും എൻഡിഎയിലെ മറ്റ് സഖ്യകക്ഷി എംപിമാരുടെയും പിന്തുണ നരേന്ദ്ര മോദിക്കുണ്ട്. പുതിയ കാലഘട്ടത്തിലേക്കാണ് രാജ്യം പ്രവേശിക്കുന്നതെന്ന് വെള്ളിയാഴ്ച രാഷ്ട്രപതിയെ കണ്ട ശേഷം മാധ്യമങ്ങളോട് സംസാരിക്കവേ മോദി പറഞ്ഞു. “എൻഡിഎ സർക്കാറിന് മൂന്നാം തവണയും ജനങ്ങളെ സേവിക്കാൻ അവസരം നൽകിയ ജനത്തിന് നന്ദി. കഴിഞ്ഞ രണ്ട് തവണയും രാജ്യത്തെ മൂന്നോട്ട് നയിക്കാൻ ശ്രമിച്ചു. ജനങ്ങളുടെ ക്ഷേമത്തിനായി പ്രവർത്തിച്ചു. ഇനിയുള്ള അഞ്ച് വർഷവും അതേ ലക്ഷ്യത്തോടെ, സമർപ്പണത്തോടെ രാജ്യത്തെ സ്വപ്നങ്ങൾ സഫലമാക്കാൻ പ്രവർത്തിക്കുമെന്ന് ഉറപ്പ് നൽകുന്നു. രാഷ്ട്രപതി സർക്കാർ രൂപീകരിക്കാൻ അനുമതി നൽകിയിട്ടുണ്ട്. ഞായറാഴ്ച വൈകീട്ട് സത്യപ്രതിജ്ഞ നടക്കും. കൂടുതൽ വിവരങ്ങൾ രാഷ്ട്രപതി ഭവൻ അറയിക്കും.”- മോദി പറഞ്ഞു.
എന്ഡിഎയുടെ പാര്ലമെന്ററി പാര്ട്ടി നേതാവായി മോദിയെ തെരഞ്ഞെടുത്തിരുന്നു. സ്ഥിരതയുളള സര്ക്കാരിനൊപ്പം നില്ക്കുമെന്നാണ് സഖ്യകക്ഷി നേതാക്കളായ നിതീഷ് കുമാറും, ചന്ദ്രബാബു നായിഡുവും നിലപാടറിയിച്ചത്.
