ദുബായ് : ഇന്ത്യയുമായുള്ള സഹകരണം ശക്തിപ്പെടുത്താൻ ആഗ്രഹം പ്രകടിപ്പിച്ച് അജ്മാൻ ചേംബർ ഓഫ് കൊമേഴ്സ്. ഇന്ത്യയുമായുള്ള സഹകരണം ശക്തിപ്പെടുത്താനുള്ള ചേമ്പറിന്റെ ആഗ്രഹം അജ്മാൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി ഡയറക്ടർ ജനറൽ സലേം അൽ സുവൈദി പ്രകടിപ്പിച്ചു.
2023ലെ കണക്കുകൾ അനുസരിച്ച് അജ്മാൻ ചേംബർ ഓഫ് കൊമേഴ്സിൽ 9549 ഇന്ത്യൻ അംഗങ്ങളുണ്ടെന്നും എമിറേറ്റിൽ ഇന്ത്യൻ നിക്ഷേപകരുടെയും ബിസിനസുകാരുടെയും എണ്ണം വർധിക്കുന്നതാണ് ഇത് സൂചിപ്പിക്കുന്നതെന്നും അദ്ദേഹം ചൂണ്ടിക്കാട്ടി.
അൽ സുവൈദിയും ദുബായിലെ ഇന്ത്യൻ കോൺസൽ ജനറൽ സതീഷ് ശിവനും തമ്മിലുള്ള കൂടിക്കാഴ്ചയിലാണ് അദ്ദേഹം ഇക്കാര്യം ചൂണ്ടിക്കാട്ടിയത്.
സംയുക്ത സാമ്പത്തിക സഹകരണം, നിക്ഷേപ അവസരങ്ങൾ, അജ്മാനും ഇന്ത്യയും തമ്മിലുള്ള വ്യാപാരബന്ധങ്ങളുടെ പ്രോത്സാഹനം തുടങ്ങിയ വിഷയങ്ങൾ ഇരുവരും ചർച്ച ചെയ്തു. വിദ്യാഭ്യാസ, ആരോഗ്യ മേഖലകളിലെ സഹകരണ സാധ്യതകൾ ഇരുവരും വിശകലനം ചെയ്തു.
നേരത്തെ ഷാർജയിലെയും ഇന്ത്യയിലെയും വാണിജ്യ സമൂഹങ്ങൾ തമ്മിലുള്ള സഹകരണം ശക്തിപ്പെടുത്തുന്നതിനും, ഉഭയകക്ഷി വ്യാപാര ബന്ധങ്ങൾ വ്യാപിപ്പിക്കുന്നതിനും, പരസ്പര നിക്ഷേപം വർധിപ്പിക്കുന്നതിനും ലക്ഷ്യമിട്ട് കൊണ്ട് ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിലിന്റെ നേതൃത്വത്തിൽ ഒരു ബിസിനസ് യോഗം സംഘടിപ്പിച്ചിരുന്നു.
ഇരു വിഭാഗങ്ങളും തമ്മിലുള്ള ഏകോപനം വർധിപ്പിക്കുക, വിവിധ സാമ്പത്തിക മേഖലകളിലെ നിക്ഷേപ സാധ്യതകൾ പര്യവേക്ഷണം ചെയ്യുക, വ്യാപാര വിനിമയങ്ങളിലും സംയുക്ത നിക്ഷേപങ്ങളിലും വളർച്ചയ്ക്ക് ഊർജം പകരാൻ സുസ്ഥിര പങ്കാളിത്തം കെട്ടിപ്പടുക്കുക തുടങ്ങിയ വിഷയങ്ങളിൽ ശ്രദ്ധ കേന്ദ്രീകരിച്ച് കൊണ്ടാണ് യോഗം നടത്തിയത്.
ഷാർജ ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയുമായി (SCCI) ചേർന്നാണ് ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ പ്രവർത്തിക്കുന്നത്. ഷാർജയിലെ ജസീറത് അൽ അലാമിൽ വെച്ച് നടന്ന പ്രത്യേക റമദാൻ വിരുന്നിന്റെ ഭാഗമായാണ് യോഗം സംഘടിപ്പിച്ചത്.
ഷാർജയിൽ പ്രവർത്തിക്കുന്ന ഇന്ത്യൻ കമ്പനികൾക്ക്, പ്രത്യേകിച്ച് ഊർജം, സമുദ്ര വ്യവസായം, ഷിപ്പിംഗ് സേവനങ്ങൾ, കപ്പൽ ഏജൻസികൾ തുടങ്ങിയ തന്ത്രപ്രധാന മേഖലകളിൽ, ലഭ്യമായ നിക്ഷേപ സഹകരണത്തിന്റെ നിലവാരവും വൈവിധ്യമാർന്ന അവസരങ്ങളും ഈ ചർച്ചയിൽ എടുത്തുകാട്ടിയിരുന്നു.
വാണിജ്യം, ഭക്ഷ്യ വ്യവസായങ്ങൾ, വിനോദസഞ്ചാരം, റിയൽ എസ്റ്റേറ്റ്, കരാർ തുടങ്ങിയ മേഖലകളിൽ വിദഗ്ധരായ ഇന്ത്യൻ കമ്പനികൾക്ക് ലഭ്യമായ അവസരങ്ങളും യോഗം വിശദീകരിച്ചു.
ജന്മഭൂമി ഓണ്ലൈന്