ബെംഗളുരു: കര്ണാടക സര്ക്കാരിനെ താഴെയിറക്കാൻ കേരളത്തില് ശത്രുസംഹാര യാഗവും മൃഗബലിയും നടത്തിയെന്ന ആരോപണവുമായി ഉപമുഖ്യമന്ത്രി ഡി.കെ ശിവകുമാര്. തന്നെയും മുഖ്യമന്ത്രി സിദ്ധരാമയ്യയെയും ലക്ഷ്യമിട്ടാണ് ഇതു നടന്നത്. ഇതിന്റെ ഭാഗമായി 21 ആടുകള്, പോത്തുകള് പന്നികള് എന്നിവയെയൊക്കെ ബലി നല്കി. ആരാണ് ഇത് ചെയ്യിപ്പിച്ചതെന്ന് അറിയാമെന്നും, എന്നാല് ഇതൊന്നും തന്നെ ഏല്ക്കില്ലെന്നും ഡി.കെ ശിവകുമാര് മാധ്യമങ്ങളോട് പറഞ്ഞു
രാജ രാജേശ്വരി ദേവസ്ഥാനത്തിന് സമീപത്തുള്ള ഒറ്റപ്പെട്ട സ്ഥലത്ത് മന്ത്രവാദ ചടങ്ങുകൾ നടന്നതായി എനിക്ക് വിശ്വസനീയമായ വിവരം ലഭിച്ചു. അവർ രാജകണ്ഡക, മരണ മോഹന സ്തംഭന യാഗങ്ങൾ നടത്തി. ‘അഘോരികള് നടത്തിയിരുന്ന യാഗങ്ങളാണ് നടന്നത്. ‘പഞ്ച ബലി’ (അഞ്ച് യാഗങ്ങള്) അനുഷ്ഠാനങ്ങള് നടത്തിയിരുന്നതായും ഞങ്ങള്ക്ക് വിവരമുണ്ട്. 21 ആടുകള്, മൂന്ന് പോത്തുകള്, 21 കറുത്ത ചെമ്മരിയാടുകള്, അഞ്ച് പന്നികള് എന്നിവയെ ബലി നല്കി. അവര് എന്ത് വേണമെങ്കിലും ചെയ്യട്ടെ. നാം വിശ്വസിക്കുന്ന ശക്തികള് നമ്മെ സംരക്ഷിക്കും. വീട്ടില്നിന്ന് പുറപ്പെടുന്നതിന് മുമ്പ് ഞാന് എപ്പോഴും പ്രാര്ത്ഥനകള് അര്പ്പിക്കാറുണ്ട്’, ശിവകുമാര് പറഞ്ഞു.
പൂജകള് ഇപ്പോഴും നടക്കുന്നുണ്ടെന്നും ശിവകുമാര് ആരോപിച്ചു. പൂജകളില് പങ്കെടുക്കുന്ന ആളുകളില് നിന്നും കൃത്യമായ വിവരങ്ങള് തനിക്ക് ലഭിക്കുന്നുണ്ടെന്നും ശിവകുമാര് പറഞ്ഞു. എന്നാല് പൂജകള് നടത്തിയത് ആരാണെന്ന് വെളിപ്പെടുത്താന് ശിവകുമാര് തയ്യാറായില്ല. കര്ണാടകയില് നിന്നുള്ള ആളുകളാണ് പൂജകള് നടത്തിയത്. അത് അവരുടെ വിശ്വാസമാണ്. അത് അവര്ക്ക് വിട്ടുനല്കുന്നു. അവര്ക്ക് ചെയ്യാവുന്നതെല്ലാം ചെയ്യട്ടെ. ഞാന് വിശ്വസിക്കുന്ന ദൈവം ശക്തനാണെന്ന് ഡി കെ ശിവകുമാര് പറഞ്ഞു. തനിക്കും സിദ്ദരാമയ്യയ്ക്കും ജനങ്ങളുടെ അനുഗ്രഹമുണ്ടെന്നും അദ്ദേഹം പറഞ്ഞു.
