ഇരിട്ടി (കണ്ണൂര്‍): ഭക്തിസാന്ദ്രമായ അന്തരീക്ഷത്തില്‍ ആയിരങ്ങളെ സാക്ഷിയാക്കി കൊട്ടിയൂര്‍ പെരുമാള്‍ സന്നിധിയില്‍ അഷ്ടമി ആരാധനയും ഇളനീരാട്ടവും. ഭണ്ഡാര അറയുടെ മുന്നില്‍ ഉച്ചശീവേലിക്കുശേഷമാണ് അഷ്ടമിപ്പാട്ട് എന്നറിയപ്പെടുന്ന അഷ്ടമി ആരാധന നടന്നത്. സ്ഥാനികനായ പന്തീരടി കാമ്പ്രമാണ് ആരാധന നടത്തിയത്.
ബുധനാഴ്ച വ്രതക്കാര്‍ ആചാരപൂര്‍വമെത്തിച്ച് തിരുവഞ്ചിറയില്‍ സമര്‍പ്പിച്ച ഇളനീര്‍ കാവുകള്‍ ഇന്നലെ രാവിലെ ഉഷഃപൂജക്കുശേഷം കൈക്കോളന്മാര്‍ ചെത്തി ഒരുക്കി അഭിഷേകത്തിനായി മണിത്തറയിലെത്തിച്ചു. കോവിലകം കയ്യാലയിലെ അധിപനായ കാര്യത്ത് കൈക്കൊളന്റെ നേതൃത്വത്തിലുള്ള മുപ്പതംഗ സംഘമാണ് ഇളനീരുകള്‍ മുഴുവന്‍ ചെത്തി ഒരുക്കി മണിത്തറയിലേക്ക് മാറ്റിയത്. തിരുവഞ്ചിറയുടെ പരിപാലനം നിവേദ്യസാധനങ്ങളെത്തിച്ചു നല്‍കല്‍ തുടങ്ങിയവയും നിര്‍വഹിക്കേണ്ടത് ഈ സംഘമാണ്.
ഇളനീരാട്ടത്തിന് തൊട്ടു മുന്നേ മുത്തപ്പന്‍ വരവ്. പുറംകലയന്‍ സ്ഥാനികന്‍ മുഖത്തെഴുത്ത് നടത്തി ശരീരം മുഴുവന്‍ ചായം പൂശി കൊട്ടേരിക്കാവില്‍ നിന്നും കുറിച്യ പടയാളികളുമായെത്തി തിരുവഞ്ചിറയില്‍ പ്രവേശിച്ച് മണിത്തറക്കടുത്ത മുഖമണ്ഡപത്തിലെത്തി ചപ്പാരം വാളുകളെ വണങ്ങി അരിയും കളഭവും പ്രസാദവുമായി മടങ്ങുന്ന ചടങ്ങാണിത്. ഇതേ സമയത്ത് തന്നെ കുറിച്യപ്പടയാളികള്‍ കൂലോം കയ്യാല ആക്രമിക്കുക എന്ന ചടങ്ങും ഉണ്ട്.
മുത്തപ്പന്‍ വരവിനുശേഷമാണ് ഇളനീരാട്ടം. ചെത്തി ഒരുക്കിയ ഇളനീരുകള്‍ സമുദായി ഭട്ടതിരിപ്പാടിന്റെ നേതൃത്വത്തില്‍ ഉഷകാമ്പ്രം നമ്പൂതിരിയാണ് സ്വയംഭൂവില്‍ അഭിഷേകം ചെയ്തത്. വൈശാഖ മഹോത്സവത്തിലെ മൂന്നാമത്തെ ആരാധനയായ രേവതി ആരാധന ജൂണ്‍ രണ്ടിനും അവസാനത്തെ ആരാധനയായ രോഹിണി ആരാധന 6നും നടക്കും.
പ്രതികരിക്കാൻ ഇവിടെ എഴുതുക: