മഴക്കെടുതി: കാരണം കേന്ദ്രം ഭരിക്കുന്ന ബിജെപി സർക്കാരും അമേരിക്കൻ സാമ്രാജ്യത്വ ശക്തികളും ഇസ്രായേലും

കേരളം നേരിടുന്ന അതിഭയാനകരമായ മഴക്കെടുതി നിങ്ങൾ അറിഞ്ഞു കാണുമല്ലോ..

കേന്ദ്രം ഭരിക്കുന്ന ബിജെപി സർക്കാരും അമേരിക്കൻ സാമ്രാജ്യത്വ ശക്തികളും, ഇസ്രായേലും ആണ് ഇതിന് കാരണം എന്ന് പറയേണ്ടതില്ലല്ലോ.

വെള്ളം കയറി കിടക്കുന്നതിനാൽ പോസ്റ്റ്‌ ഓഫീസിന്റെ മുന്നിൽ കുത്തിയിരുന്ന് കേരളത്തിന് എതിരെ ഗൂഢാലോചന നടത്തുന്ന അമേരിക്കക്ക്‌ എതിരെ മുദ്രാവാക്യം വിളിക്കുന്നതിന്‌ പ്രയാസം ഉണ്ട്. അതുകൊണ്ട് സാമ്രാജ്യത്വ ശക്തികൾക്ക് എതിരെയുള്ള പോരാട്ടം ഇപ്പോൾ സാധിക്കില്ല.

ഇപ്പോൾ നമുക്ക് വേണ്ടത് 2018 ലെ വെള്ളപൊക്ക സമയത്ത് ലഭിച്ചത് പോലുള്ള സാമ്പത്തീക സഹായങ്ങൾ ആണ്.

വെള്ളപ്പൊക്കത്തിൽ നിന്ന് കേരളത്തെ രക്ഷിക്കാൻ വേണ്ടിയുള്ള പദ്ധതികൾക്കായി നമ്മുടെ മുഖ്യമന്ത്രി വിദേശ രാജ്യങ്ങളിൽ പല തവണ പോയി എന്ന കാര്യം നമ്മൾ മറക്കരുത്. എല്ലാം കേരളത്തിന്റെ നന്മക്ക്‌ വേണ്ടി മാത്രം ആയിരുന്നു, അല്ലാതെ പ്രതിപക്ഷം പറയുന്നത് പോലെ ജനങ്ങളുടെ നികുതിപ്പണം എടുത്ത് കുടുംബവും ഒത്തുള്ള ഉല്ലാസ യാത്ര ആയിരുന്നില്ല അതൊന്നും.

‘റൂം ഫോർ റിവർ’ പദ്ധതിയൊക്കെ നടപ്പാക്കാൻ ഇരുന്നപ്പോൾ ആണ് അമേരിക്ക ഇറാന് മേലെ യുദ്ധ വിമാനം പറത്തിയത്, അപ്പോൾ അമേരിക്കക്ക് എതിരെ പ്രതിരോധം തീർക്കാൻ വേണ്ടി തേഞ്ഞിപ്പാലം പോസ്റ്റ്‌ ഓഫീസ് ഉപരോധിക്കേണ്ടി വന്നു. പിന്നീട് നടപ്പാക്കാൻ തുടങ്ങിയപ്പോൾ ഉക്രൈൻ – റഷ്യ യുദ്ധം വന്നു, ഇടപെടാതിരിക്കാൻ കഴിയുമോ…?

ഐക്യരാഷ്‌ട്ര സഭയുടെ സെക്രട്ടറി ജനറൽ ആണെങ്കിൽ ഉപദേശം തേടി ദിവസവും വിളിക്കും. അമേരിക്കൻ പ്രസിഡന്റ്‌ ജോ ബൈഡൻ ആകട്ടെ തൊട്ടതിനും പിടിച്ചതിനും ഒക്കെ അനുവാദം ചോദിച്ച് വിളിച്ചു ശല്യപ്പെടുത്തി കൊണ്ടിരിക്കും..

അതിനിടയിൽ ആമസോൺ കാടുകളിലെ തീ കെടുത്താത്തിൽ പ്രതിഷേധിച്ചു ബ്രസീൽ പ്രസിഡന്റിനെ താക്കീത് ചെയ്യേണ്ടി വന്നു.

ഇതിനിടയിൽ ഒന്ന് ഫ്രീ ആകാമെന്ന് വെച്ചപ്പോൾ സ്ത്രീകളെ ബലാത്സംഗം ചെയ്ത് കൊല്ലുന്ന ഹമാസ് ‘പോരാളികൾക്ക്’ ഐക്യദാർഢ്യം പ്രഖ്യാപിച്ച് നാടെങ്ങും റാലികളും സമ്മേളനങ്ങളും…!

ഇപ്പോൾ മനസിലായില്ലേ കേരളത്തിൽ എല്ലാവർഷവും വെള്ളപൊക്കം ഉണ്ടായിട്ടും ജനം ദുരിതം അനുഭവിക്കേണ്ടി വരുന്നത് സർക്കാർ വീഴ്ച കൊണ്ടല്ല, മറിച്ച് അമേരിക്കയും, ഇസ്രായേലും, കുത്തക മുതലാളിമാരും കാരണമാണെന്ന്.

അതുകൊണ്ട് എനിക്ക് നിങ്ങളോട് അഭ്യർത്ഥിക്കാൻ ഉള്ളത് കേരളത്തെ രക്ഷിക്കാൻ എല്ലാവരും, പ്രത്യേകിച്ച് പ്രവാസികൾ ചുരുങ്ങിയത് ഒരു 3 മാസത്തെ ശമ്പളം എങ്കിലും മുഖ്യമന്ത്രിയുടെ ദുരിതശ്വാസ നിധിയിലേക്ക് സംഭാവന ചെയ്യണം, സർക്കാർ ജീവനക്കാർ ഒരു 6 മാസത്തെ ശമ്പളം ആയിക്കോട്ടെ.

കേരളത്തിൽ എല്ലാത്തിനും വിലക്കുറവ് ആയത് കൊണ്ടും, സർക്കാർ വക ധനസഹായങ്ങൾ കൃത്യമായി ജനങ്ങൾക്ക് ലഭിക്കുന്നത് കൊണ്ടും, എല്ലാവർക്കും DYFI വക പൊതിച്ചോർ കൊടുക്കുന്നത് കൊണ്ടും ആർക്കും ചെലവ് ഒന്നുമില്ലല്ലോ..!

ഈ വെള്ളപൊക്ക സീസൺ കഴിഞ്ഞാൽ വെള്ളപൊക്കത്തെ കുറിച്ച് കൂടുതൽ പഠിക്കാൻ വീണ്ടും ചിലപ്പോൾ അദ്ദേഹത്തിന് വിദേശത്തേക്ക് പോകേണ്ടി വന്നേക്കാം.

അപ്പോൾ നമ്മുടെ സ്ഥിരം ഐറ്റം ആയ ‘ നന്മയുള്ള ലോഹമേ ‘ പാട്ടും പാടി എല്ലാവരും മുഖ്യമന്ത്രിയുടെ ദുരിതാശ്വാസ നിധിയിലേക്ക് വീണ്ടും വീണ്ടും ഉദാരമായി സംഭാവന ചെയ്യുക