അങ്കമാലി: സ്വര്‍ണ്ണം കടത്തിയ യുവതി വളരെയെളുപ്പത്തില്‍ കസ്റ്റംസിന്റെ കണ്ണുവെട്ടിച്ച് പുറത്തുകടന്നു. പക്ഷെ വിമാനത്താവളത്തിന് പുറത്ത് ബൈക്കുയാത്രക്കാരനൊപ്പം കയറിപ്പോകാന്‍ തുടങ്ങിയ യുവതിയെ കാറിലെത്തിയ സംഘം തട്ടിക്കൊണ്ടുപോകാന്‍ ശ്രമിച്ചു. ഇതോടെ അപകടം മണത്ത യുവതി ഗുണ്ടാംസംഘത്തില്‍ നിന്നും രക്ഷപ്പെടാന്‍ വിമാനത്താവളത്തിനകത്തേക്ക് ഓടിക്കയറി കസ്റ്റംസിന് പിടികൊടുത്തു.
ചൊവ്വാഴ്ചയായിരുന്നു കൊച്ചി വിമാനത്താവളത്തില്‍ ഈ നാടകീയ സംഭവങ്ങള്‍ അരങ്ങേറിയത്. കൊച്ചി വിമാനത്താവളത്തില്‍ വിമാനമിറങ്ങി ടെര്‍മിനലിനു പുറത്തെത്തിയ യുവതി ബൈക്കിലെത്തിയ ആളോടൊപ്പം പോകാന്‍ തുനിഞ്ഞു. എന്നാല്‍, കാറുമായി എത്തിയ സംഘം യുവതിയോട് കാറില്‍ കയറാന്‍ ആവശ്യപ്പെട്ടു.
യുവതി ഉടന്‍ ടാക്‌സി തരപ്പെടുത്തി അതില്‍ കയറി രക്ഷപ്പെടാന്‍ ശ്രമിച്ചു. എന്നാല്‍, കാറിലെത്തിയ സംഘം യുവതിയെ പിന്‍തുടര്‍ന്നു. പിടിയിലാകുമെന്ന് കണ്ടപ്പോള്‍ യുവതി കാര്‍ വിമാനത്താവളത്തിലേക്ക് തിരിക്കാന്‍ ആവശ്യപ്പെട്ടു. വിമാനത്താവളത്തിലേക്ക് ഓടിക്കയറിയ യുവതി ടെര്‍മിനല്‍ മാനേജരുടെ കാബിനില്‍ അഭയം തേടുകയായിരുന്നു.
ടെര്‍മിനല്‍ മാനേജര്‍ അറിയിച്ചതിനെ തുടര്‍ന്ന് കസ്റ്റംസ് ഉദ്യോഗസ്ഥരെത്തി യുവതിയെ കസ്റ്റഡിയിലെടുത്തു. വിശദമായ പരിശോധനയില്‍ ഇവര്‍ ധരിച്ചിരുന്ന ചെരിപ്പില്‍ 250 ഗ്രാം സ്വര്‍ണം കണ്ടെത്തി.
ഇവരെ കൂട്ടിക്കൊണ്ടുപോകാന്‍ ബൈക്കിലെത്തിയ ആളെ നെടുമ്പാശ്ശേരി പോലീസ് കസ്റ്റഡിയിലെടുത്തിട്ടുണ്ട്. യുവതിയെ തട്ടിക്കൊണ്ടുപോകാന്‍ കാറിലെത്തിയ സംഘത്തെ കണ്ടെത്താനായിട്ടില്ല.
പ്രതികരിക്കാൻ ഇവിടെ എഴുതുക: