ആലപ്പുഴ: ഇത്തവണത്തെ വിഷു ബമ്പര് ഭാഗ്യം കൊണ്ടു വന്നത് ലോട്ടറി ചില്ലറ വില്പ്പനക്കാരിയായ ജയയ്ക്ക് കൂടിയാണ്. ആലപ്പുഴ കൈതവനയില് തൃക്കാര്ത്തിക ലോട്ടറി ഏജന്സിയുടെ ഉടമ അനില്കുമാറില് നിന്നും വാങ്ങിയ ടിക്കറ്റാണ് ജയ വിറ്റത്. ഇതില് വി സി 490987 എന്ന നമ്പറിലുള്ള ടിക്കറ്റിനാണ് ഒന്നാം സമ്മാനം .
ആലപ്പുഴ പഴവീട് സ്വദേശിയാണ് ജയ. വീടിനടുത്തുള്ള ചെറിയ കടയിലാണ് ജയ ലോട്ടറി വില്ക്കുന്നത്. ചെറുകടികളും ചായയും കടയിലുണ്ട്. ഒന്നാം സമ്മാനത്തിന് അര്ഹമായ ടിക്കറ്റെടുത്തതെന്ന് ആരാണെന്ന് ഓര്മയില്ലെന്ന് ജയ പറഞ്ഞു.
ടിക്കറ്റ് ആരാണ് വാങ്ങിയതെന്നും എപ്പോഴാണ് വാങ്ങിയതെന്നും ഓര്മയില്ല. പതിനാറ് വര്ഷമായി ലോട്ടറി വില്ക്കുന്നുണ്ട്. ആദ്യം പള്ളാത്തുരുത്തിയിലായിരുന്നു. പിന്നീടാണ് പഴവീടിലേക്ക് മാറിയത്. കൊവിഡിന് ശേഷം ഭര്ത്താവിന്റെ ജോലി നഷ്ടമാവുക മാത്രമല്ല പിന്നീട് ഒരപകടവും ഉണ്ടായി. വലിയ സാമ്പത്തിക ബുദ്ധിമുട്ടിലാണ് കുടുംബമെന്ന് ജയ പറഞ്ഞു.കടം മാത്രം 12 ലക്ഷത്തോളം രൂപയുണ്ട്. കമ്മിഷന് ലഭിക്കുന്നതോടെ കടമെല്ലാം വീട്ടാന് കഴിയുമെന്നാണ് പ്രതീക്ഷ. ജയയ്ക്ക് ഇടയ്ക്ക് 30000 രൂപയും അയ്യായിരം രൂപയുമൊക്കെ ലോട്ടറി അടിച്ചിട്ടുണ്ട്.
