ഇരിട്ടി: ഭക്തജന തിരക്കിലമര്‍ന്ന് കൊട്ടിയൂര്‍ വൈശാഖ മഹോത്സവ നഗരി. ഇന്നലെ പുലര്‍ച്ചെ മുതല്‍ ആരംഭിച്ച ഭക്തജന പ്രവാഹത്തിന് വൈകുന്നേരത്തോടെയാണ് അല്‍പ്പം ശമനമുണ്ടായത്. ഉത്സവത്തിലെ നാല് ആരാധനകളില്‍ ആദ്യത്തേതായ തിരുവോണം ആരാധനയും നാളെ നടക്കുന്ന ഇളനീരാട്ടത്തിനുള്ള ഇളനീര്‍ വെപ്പും ഇന്ന് നടക്കും. തിരുവോണം ആരാധനാ നാളില്‍ത്തന്നെ ഇളനീര്‍ വെപ്പും വരുന്നത് വളരെ അപൂര്‍വമാണ്.
തിരുവോണം ആരാധനക്കായി കോട്ടയം കോവിലകത്ത് നിന്നും എഴുന്നള്ളിച്ചെത്തിക്കുന്ന അഭിഷേക സാധനങ്ങളും കരോത്ത് നായര്‍ തറവാട്ടില്‍ നിന്നും എത്തിക്കുന്ന പഞ്ചഗവ്യവും തേടന്‍ വാര്യര്‍ സ്വീകരിച്ച് അക്കരെ ക്ഷേത്രത്തില്‍ എത്തിക്കും. ഉഷപൂജയ്‌ക്ക് ശേഷമാണ് ആരാധനാപൂജ നടക്കുക. തുടര്‍ന്ന് നിവേദ്യ പൂജകഴിഞ്ഞ് ശീവേലിക്ക് സമയമറിയിച്ച് ‘ശീവേലിക്ക് വിളിക്കുന്നതോടെ’ എഴുന്നള്ളത്തിന് തുടക്കമാവും.
തിരുവോണം ആരാധന ദിവസം പൊന്നിന്‍ ശീവേലിയും ഉച്ചക്ക് ആരാധനാ സദ്യയും നടക്കും. തിരുവോണം മുതലാണ് ശീവേലിക്ക് വിശേഷവാദ്യങ്ങള്‍ ആരംഭിക്കുക. കരിമ്പന ഗോപുരത്തില്‍ നിന്നും എഴുന്നള്ളിച്ചെത്തിച്ച ഭണ്ഡാരങ്ങള്‍ ശീവേലിക്ക് അകമ്പടിയായി ഉണ്ടാകും. ഉത്സവ ദിവസങ്ങളില്‍ അക്കരെ കൊട്ടിയൂരില്‍ നടന്നു വരാറുള്ള മത്തവിലാസം കൂത്ത് ഇന്നുമുതലാണ് പൂര്‍ണ്ണ രൂപത്തില്‍ ആരംഭിക്കുക. പാഠകവും തിരുവോണം നാളായ ഇന്ന് മുതല്‍ ആരംഭിക്കും. സന്ധ്യയ്‌ക്ക് പാലമൃത് അഭിഷേകവും നടത്തും.
നാളെ നടക്കുന്ന ഇളനീരാട്ടത്തിനായി ഇളനീര്‍ കാവുമായി എത്തുന്ന വ്രതക്കാര്‍ ഇന്ന് വൈകുന്നേരത്തോടെ കൊട്ടിയൂരില്‍ എത്തിച്ചേരും. രാത്രി ശീവേലിയും ശ്രീ ഭൂതബലിയും കഴിഞ്ഞ് കാര്യത്ത് കൈക്കോളന്‍ തിരുവന്‍ചിറയിലെ കിഴക്കേനടയില്‍ തട്ടും പോളയും വിരിക്കുകയും കുടിപതി കാരണവര്‍ വെള്ളി ക്ടാരം വച്ച് രാശി വിളിക്കുകയും ചെയ്താല്‍ ഇളനീര്‍ വെപ്പ് ആരംഭിക്കും.
പ്രതികരിക്കാൻ ഇവിടെ എഴുതുക: