വൈക്കം: മതത്തെ നിരസിച്ചുകൊണ്ടല്ല, അതിനുള്ളില് നിന്നുകൊണ്ട് മതത്തെ കൂടുതല് ശാക്തീകരിച്ചു വേണം അനാചാരങ്ങളില് നിന്ന് മോചനം നേടേണ്ടതെന്ന് ഹിന്ദു ഐക്യവേദി സംസ്ഥാന പ്രസിഡന്റ് കെ.പി. ശശികല ടീച്ചര്.
വൈക്കം ഗൗരീശങ്കരം ഓഡിറ്റോറിയത്തില് നടക്കുന്ന ഹിന്ദു ഐക്യവേദിയുടെ 21 ാമത് സംസ്ഥാന സമ്മേളനത്തോടനുബന്ധിച്ചുള്ള ഹിന്ദു നേതൃസമ്മേളനത്തില് അധ്യക്ഷത വഹിക്കുകയായിരുന്നു അവര്. സനാതന ധര്മത്തെ തകര്ക്കാന് ശ്രമിക്കുന്നവര്ക്ക് മുന്നില് അതിനെ കൂടുതല് ശാക്തീകരിച്ചു മുന്നേറണം. ഹിന്ദുക്കളുടെ പ്രശ്നങ്ങള് സമുദായത്തിനകത്തു നിന്നു കൊണ്ടു വേണം പരിഹരിക്കാന്. വൈക്കം സത്യഗ്രഹത്തിന്റെ സവിശേഷതയും അതായിരുന്നു.
ഞാന് ഹിന്ദുവാണ് എന്ന് പ്രതിജ്ഞ എടുത്തുകൊണ്ടാണ് വൈക്കം സത്യഗ്രഹത്തില് ഓരോരുത്തരും പങ്കെടുത്തത്. ഞാന് ഹിന്ദുവാണെന്ന് പറയുന്നവരെ അധിക്ഷേപിക്കുന്നവര്ക്ക് മുന്നില് പരസ്പരം കൈകോര്ത്ത് പിടിച്ച് ആത്മാഭിമാനത്തോടെ നമ്മള് ഹിന്ദുക്കള് ആണ്, ഹിന്ദുവായി തന്നെ ജീവിക്കുമെന്ന് പറയാന് സാധിക്കണം, ശശികല ടീച്ചര് പറഞ്ഞു.
