എസ്എറ്റി ആശുപത്രി പ്രദേശത്ത് ഗുണ്ടാ ആക്രമണം; അഞ്ചംഗസംഘം യുവാവിനെ വളഞ്ഞിട്ട് മർദ്ദിച്ചു, വീഡിയോ ദൃശ്യങ്ങൾ പുറത്ത്

മെഡിക്കൽ കോളേജ് : എസ്എറ്റി ആശുപത്രി പ്രദേശത്ത് ഗുണ്ടാ ആക്രമണം. വീഡിയോ ദൃശ്യങ്ങൾ പുറത്തായി. ആക്രമണത്തിൽ ഗുരുതര പരിക്കേറ്റ വിളപ്പിൽശാല സ്വദേശി അനന്തു (18) നെ മെഡിക്കൽ കോളേജ് ആശുപത്രി തീവ്രപരിചരണ വിഭാഗത്തിൽ പ്രവേശിപ്പിച്ചു.

ഇന്നലെ വൈകിട്ട് നാല് മണിയോടെ എസ്എറ്റി ഗൈനക് ഒപിയ്‌ക്ക് സമീപമുള്ള ജനറേറ്റർ സ്ഥാപിച്ചിട്ടുള്ള കെട്ടിടത്തിന് മുന്നിലാണ് സംഭവം. ഓട്ടോറിക്ഷയിൽ മാരകായുധങ്ങളുമായി എത്തിയ അഞ്ചംഗ സംഘമാണ് മർദ്ദിച്ചത്. ഇരുമ്പ് ചുറ്റികയും തടിയും കൊണ്ട് വളഞ്ഞിട്ട് അനന്തുവിനെ മർദ്ദിക്കുന്ന കാഴ്ചയാണ് വീഡിയോ ദൃശ്യങ്ങളിലൂടെ പ്രചരിച്ചത്.

എന്നെ കൊല്ലല്ലേയെന്ന് അനന്തു ഉറക്കെ പറയുന്നുണ്ടെങ്കിലും അക്രമികൾ തല്ലി കൊല്ലടാ അവനെ എന്ന് ആക്രോശിച്ചു കൊണ്ടായിരുന്നു മർദ്ദിച്ചത്. മെഡിക്കൽ കോളേജ് തീവ്രപരിചരണ വിഭാഗത്തിൽ ചികിത്സയിൽ കഴിയുന്ന അനന്തു അപകടനില തരണം ചെയ്തിട്ടില്ലായെന്നാണ് അറിയാൻ കഴിഞ്ഞത്. അക്രമികളെ സംബന്ധിച്ച് വിവരങ്ങളില്ല. ആശുപത്രിയിൽ നിന്നുള്ള അറിയിപ്പിനെ തുടർന്ന് മെഡിക്കൽ കോളേജ് പോലീസ് കേസെടുത്തു.