തിരുവനന്തപുരം: ആറ്റിങ്ങല്‍ ഇരട്ടക്കൊലപാതക കേസില്‍ ഒന്നാം പ്രതി നിനോ മാത്യുവിന്റെ വധശിക്ഷ ജീവപര്യന്തമാക്കി കുറച്ചു. നിനോ മാത്യു 25 വര്‍ഷം പരോള്‍ ഇല്ലാതെ ശിക്ഷ അനുഭവിക്കണമെന്ന് കോടതി ഉത്തരവില്‍ പറയുന്നു.
അതേസമയം രണ്ടാം പ്രതി അനുശാന്തി ശിക്ഷാ ഇളവ് ആവശ്യപ്പെട്ട് സമര്‍പ്പിച്ച ഹര്‍ജി തള്ളിയ ഹൈക്കോടതി അനുശാന്തിയുടെ ഇരട്ടജീവപര്യന്തം ശിക്ഷ ശരിവച്ചു.
2014 ലാണ് കേസിന് ആധാരമായ സംഭവം. ടെക്‌നോപാര്‍ക്കിലെ ജീവനക്കാരായിരുന്നു അനുശാന്തിയും നിനോ മാത്യുവും. ഇരുവരും പ്രണയത്തിലായിരുന്നു. നേരത്തെ വിവാഹിതയായിരുന്ന അനുശാന്തിക്ക് ഈ ബന്ധത്തില്‍ നാല് വയസ് പ്രായമുണ്ടായിരുന്ന കുഞ്ഞുണ്ടായിരുന്നു. ഈ കുഞ്ഞിനെയും ഭര്‍ത്താവിന്റെ അമ്മയെയും കൊലപ്പെടുത്തിയ കേസിലാണ് കോടതി ശിക്ഷിച്ചത്. കാമുകന്‍ നിനോ മാത്യുവാണ് കൊലപാതകങ്ങള്‍ നടത്തിയത്.
അനുശാന്തി നിനോ മാത്യുവിന് ഫോണിലൂടെ അയച്ച വീടിന്റെ ചിത്രങ്ങളും വഴിയുമുള്‍പ്പെടെ ഡിജിറ്റില്‍ തെളിവുകള്‍ നിര്‍ണായകമായിരുന്നു. 2016 ഏപ്രിലില്‍ തിരുവനന്തപുരം പ്രിന്‍സിപ്പല്‍ സെഷന്‍സ് കോടതി നിനോ മാത്യുവിനെ വധശിക്ഷയ്‌ക്കും അനുശാന്തിയെ ഇരട്ട ജീവപര്യന്തം തടവിനും ശിക്ഷിച്ചിരുന്നു.
പ്രതികരിക്കാൻ ഇവിടെ എഴുതുക: