മുംബൈ: പുനെയില് ആഡംബര കാറിടിച്ച് രണ്ടുപേര് മരിച്ച സംഭവത്തില് വാഹനമോടിച്ചിരുന്ന പതിനേഴുകാരന്റെ അച്ഛനെ ക്രൈംബ്രാഞ്ച് അറസ്റ്റ് ചെയ്തു. ബ്രഹ്മ റിയാലിറ്റി ആന്ഡ് ഇന്ഫ്രാസ്ട്രക്ചര് ഉടമ വിശാല് അഗര്വാളാണ് അറസ്റ്റിലായത്.
കല്ല്യാണിനഗറിലെ അപകടത്തില് പതിനേഴുകാരനെ പോലീസ് അറസ്റ്റ് ചെയ്തെങ്കിലും 15 മണിക്കൂറിനുള്ളില് ജാമ്യം അനുവദിച്ചത് വലിയ വിമര്ശനത്തിനിടയാക്കി. റോഡപകടങ്ങളെ സംബന്ധിച്ച് 300 വാക്കില് കവിയാത്ത ഉപന്യാസം എഴുതുക, 15 ദിവസം ട്രാഫിക് പോലീസിനൊപ്പം പ്രവര്ത്തിക്കുക, മദ്യപിക്കുന്ന ശീലം ഉള്പ്പെടെ മാറ്റാനായി കൗണ്സലിങ്ങിന് വിധേയനാകുക തുടങ്ങിയ ഉപാധികളോടെയാണ് റിയല് എസ്റ്റേറ്റ് വ്യവസായിയുടെ മകന് കോടതി ജാമ്യം നല്കിയത്. എന്നാല്, ഇതിനെതിരേ വ്യാപക വിമര്ശനമാണുയര്ന്നത്. തൊട്ടു പിന്നാലെ കേസ് ക്രൈംബ്രാഞ്ചിനു വിടുകയായിരുന്നു.
പന്ത്രണ്ടാംക്ലാസ് പരീക്ഷയിലെ വിജയം ആഘോഷിക്കാന് സുഹൃത്തുക്കള്ക്കൊപ്പം പബ്ബില് പോയി മദ്യപിച്ച ശേഷം കാറോടിച്ചു വരുമ്പോഴാണ് അപകടമുണ്ടായത്. 200 കിലോമീറ്റര് വേഗത്തിലാണ് പോര്ഷെ കാറോടിച്ചിരുന്നത്. ഞായറാഴ്ച പുലര്ച്ചെ 2.15ന് കല്യാണിനഗറില് വച്ച് ഈ കാറിടിച്ച് ബൈക്ക് യാത്രികരായ മധ്യപ്രദേശിലെ ബിര്സിങ്പുര് സ്വദേശി അനീഷ് ആവാഡിയ(24), ജബല്പുര് സ്വദേശിനി അശ്വിനി കോഷ്ത(24) എന്നിവര്ക്കാണ് ദാരുണാന്ത്യമുണ്ടായത്.
പതിനേഴുകാരന് മദ്യം നല്കിയ പബ്ബുടമകളായ പ്രഹഌദ് ബുത്ദ, സന്ദീപ് സാംഗിള് എന്നിവരെ ഔറംഗാബാദില് നിന്ന് അറസ്റ്റ് ചെയ്തു. ഡ്രൈവിങ് ലൈസന്സ് ഇല്ലാത്തയാള് മദ്യപിച്ച് 200 കിലോമീറ്ററില്ക്കൂടുതല് വേഗത്തിലാണ് വാഹനമോടിച്ചതെന്നും അതിനാല് ഇത് അപകടമല്ലെന്നും കൊലപാതകമാണെന്നും ബന്ധുക്കള് ആരോപിച്ചു.
ഒരു ചടങ്ങില് പങ്കെടുത്ത് ബൈക്കില് മടങ്ങുന്നതിനിടെയാണ് അനീഷും അശ്വിനിയും സഞ്ചരിച്ചിരുന്ന ബൈക്കിനെ കാര് ഇടിച്ചു തെറിപ്പിച്ചത്. ചോരയൊലിച്ച് രണ്ടു പേരും റോഡില് കിടക്കുന്നതിന്റെ ദൃശ്യങ്ങളും അപകടത്തിന് പിന്നാലെ സാമൂഹികമാധ്യമങ്ങളില് പ്രചരിച്ചിരുന്നു.
മഹാരാഷ്ട്രയില് 25 വയസ് മുതല് പ്രായമുള്ളവര്ക്കാണ് മദ്യം ഉപയോഗിക്കാന് അനുവാദമുള്ളത്. ഈ നിയമം ലംഘിച്ചാണ് പതിനേഴുകാരന് ബാറില് മദ്യം വിളമ്പിയതെന്നും പോലീസ് പറഞ്ഞു. പ്രതിക്ക് 17 വര്ഷവും എട്ടു മാസവുമാണ് പ്രായം. ജാമ്യം അനുവദിക്കരുതെന്നായിരുന്നു പ്രോസിക്യൂഷന്റെ ആവശ്യം. പ്രതിയെ പ്രായപൂര്ത്തിയായ ആളായി കണക്കാക്കി വിചാരണചെയ്യണമെന്ന് പ്രോസിക്യൂഷന് കോടതിയില് ആവശ്യപ്പെട്ടിരുന്നു. എന്നാല് ഈ ആവശ്യമുന്നയിച്ചുള്ള ഹര്ജി കോടതി തള്ളുകയായിരുന്നു. ഇതേ ആവശ്യം ഉന്നയിച്ച് ഇനി സെഷന്സ് കോടതിയെ സമീപിക്കുമെന്നും പോലീസ് അറിയിച്ചു.
