തൊടുപുഴ: സംസ്ഥാനത്ത് കാലവര്ഷത്തിന്റെ പ്രതീതിയുളവാക്കി വേനല്മഴ ശക്തമായി. അന്തരീക്ഷച്ചുഴികളുടെ സ്വാധീനമാണ് മഴ ശക്തമാകാന് കാരണം. പകല് വടക്കന് ജില്ലകളിലും മഴ ശക്തമായി. നാളെ പത്തനംതിട്ട, കോട്ടയം, ഇടുക്കി ജില്ലകളിലാണ് റെഡ് അലര്ട്ടുള്ളത്. നേരത്തേ ആലപ്പുഴയില് പ്രഖ്യാപിച്ചിരുന്ന റെഡ് അലര്ട്ട് പിന്വലിച്ചു. തിരുവനന്തപുരം, കൊല്ലം, ആലപ്പുഴ, എറണാകുളം, തൃശ്ശൂര് ജില്ലകളില് ഓറഞ്ച് അലര്ട്ടുണ്ട്.
പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് യെല്ലോ അലര്ട്ടുമുണ്ട്. അതേ സമയം റെഡ് അലര്ട്ട് പ്രഖ്യാപിച്ചെങ്കിലും 20 സെ.മീറ്ററിനു മുകളിലുള്ള മഴ റിപ്പോര്ട്ട് ചെയ്തിട്ടില്ല. ഓട്ടോമേറ്റഡ് സ്റ്റേഷനുകളില് 19 സെ.മീ. വരെ മഴ രേഖപ്പെടുത്തിയിട്ടുണ്ട്.
തെക്കു പടിഞ്ഞാറന് ബംഗാള് ഉള്ക്കടലില് നാളെയോടെ ന്യൂനമര്ദം രൂപമെടുക്കും. ഇതു ചുഴലിക്കാറ്റാകാനുള്ള സാധ്യതയും പ്രവചിക്കുന്നുണ്ട്. കാലവര്ഷം കൂടുതല് സ്ഥലങ്ങളിലേക്കു വ്യാപിക്കുകയാണ്. 23 വരെ കേരളത്തില് നിന്ന് മത്സ്യബന്ധനത്തിനു പോകുന്നതിന് വിലക്കുണ്ട്.
