കൊച്ചി : നര്ത്തകന് ഡോ ആര്എല്വി രാമകൃഷ്ണനെതിരെ ജാതി അധിക്ഷേപം നടത്തിയെന്ന കേസില് നര്ത്തകി സത്യഭാമയുടെ അറസ്റ്റ് ഹൈക്കോടതി താത്കാലികമായി തടഞ്ഞു. കേസ് വീണ്ടും പരിഗണിക്കുന്ന ഈ മാസം 27 വരെ സത്യഭാമയെ അറസ്റ്റ് ചെയ്യുന്നത് ഹൈക്കോടതി വിലക്കി.
അറസ്റ്റ് തടയണമെന്ന ആവശ്യത്തില് മറുപടി നല്കാന് സര്ക്കാരിനും ജസ്റ്റിസ് കെ.ബാബു നിര്ദേശം നല്കി.
സത്യഭാമയുടെ മുന്കൂര് ജാമ്യാപേക്ഷ നേരത്തെ നെടുമങ്ങാട് സെഷന്സ് കോടതി തള്ളിയിരുന്നു. ഇതു ചോദ്യം ചെയ്താണ് ഇവര് ഹൈക്കോടതിയില്യെ സമീപിച്ചത്. സത്യഭാമ ആരെയും പേരെടുത്തു പറഞ്ഞിട്ടില്ലെന്നും അതുകൊണ്ടു തന്നെ പരാതി നിലനില്ക്കില്ലെന്നും സത്യഭാമയ്ക്ക് വേണ്ടി അഡ്വ. ബി.എ.ആളൂര് വാദിച്ചു.
യൂട്യൂബ് ചാനലിന് നല്കിയ അഭിമുഖത്തിലാണ് കലാമണ്ഡലം സത്യഭാമ ഡോ ആര്എല്വി രാമകൃഷ്ണനെതിരെ ജാതി അധിക്ഷേപം നടത്തിയെന്ന് ആരോപണമുയര്ന്നത്.മോഹിനിയാട്ടം കളിക്കുന്ന വ്യക്തികള് എപ്പോഴും മോഹിനിയായിരിക്കണം . പുരുഷന്മാരാണ് മോഹിനിയാട്ടം കളിക്കുന്നതെങ്കില് സൗന്ദര്യമുള്ളവരായിരിക്കണം. ചിലരുണ്ട്, കാക്കയുടെ നിറമാണ്. മോഹിനിയാട്ടത്തിന് കൊള്ളില്ല. പെറ്റതള്ള പോലും കണ്ടാല് സഹിക്കില്ലെന്നും സത്യഭാമ പറഞ്ഞിരുന്നു.
