പാർക്ക് ചെയ്ത ട്രാവലർ മുന്നോട്ട് നീങ്ങി; ഡ്രൈവർക്ക് ദാരുണാന്ത്യം

കൊച്ചി: പാർക്ക് ചെയ്ത ട്രാവലർ മുന്നോട്ട് നീങ്ങിയത് നിർത്താൻ ശ്രമിക്കവെ യുവാവിന് ദാരുണാന്ത്യം. വാഹനത്തിന് അടിയിൽ പെട്ട് മൂവാറ്റുപുഴ വാളകം സ്വദേശി നന്ദുവാണ് മരിച്ചത്. വാഹനത്തിന്റെ ഡ്രൈവറായിരുന്നു നന്ദു. വ്യാഴാഴ്ച ഉച്ചയ്‌ക്ക് 12 മണിയോടെയായിരുന്നു സംഭവം.

ഓട്ടം കഴിഞ്ഞ് മടങ്ങിയെത്തിയ നന്ദു വീടിന് സമീപം ട്രാവലർ പാർക്ക് ചെയ്ത ശേഷം മടങ്ങവെയാണ് വാഹനം മുന്നോട്ട് നീങ്ങിയത്. റോഡിലേക്ക് പോകുന്നത് തടയാൻ വാഹനത്തിൽ കയറാൻ ശ്രമിച്ച നന്ദു പിടിവിട്ട് വാഹനത്തിന് അടിയിലേക്ക് വീഴുകയായിരുന്നു. സമീപമുണ്ടായിരുന്ന കിടങ്ങിലെ കെട്ടിലിടിച്ച് ട്രാവലർ നിന്നതോടെ യുവാവ് വാഹനത്തിന് അടിയിൽ കുടുങ്ങി.

പ്രദേശവാസികൾ വാഹനം ഉയർത്തി നന്ദുവിനെ രക്ഷിക്കാൻ ശ്രമിച്ചെങ്കിലും ജീവൻ രക്ഷിക്കാനായില്ല. തുടർന്ന് ജെസിബി എത്തിച്ചാണ് വാഹനം നീക്കിയത്.