തേനി: തമിഴ്നാട്ടില് കമ്പത്ത് കാറിനുള്ളില് മരിച്ച നിലയില് കണ്ടെത്തിയ മൂന്ന് പേരെയും തിരിച്ചറിഞ്ഞു. കോട്ടയം തുപ്പള്ളി കാഞ്ഞിരത്തുംമൂട് സ്വദേശികളും വാകത്താനത്ത് വാടകയ്ക്ക് താമസിക്കുന്നവരുമായ ജോര്ജ് പി സ്കറിയ (60),ഭാര്യ മേഴ്സി (58) മകന് അഖില് (29) എന്നിവരെയാണ് കാറിനുളളില് മരിച്ച നിലയില് കണ്ടെത്തിയത്.
ഇവരെ കഴിഞ്ഞ ദിവസം മുതല് കാണാനില്ലായിരുന്നു. വാകത്താനം പൊലീസ് കേസും രജിസ്റ്റര് ചെയ്തിരുന്നു. സാമ്പത്തിക ബാധ്യതയെ തുടര്ന്ന് ഇവര് ജീവനൊടുക്കിയതായാണ് കരുതുന്നത്.
കമ്പം-കമ്പംമേട് റോഡില് നിന്ന് മാറി ഒരു തോട്ടത്തിനകത്ത് പാര്ക്ക് ചെയ്ത ഹ്യുണ്ടായ് ഗ്രാന്റ് ഐ10 കാറിനകത്ത് രണ്ട് പുരുഷന്മാരുടെയും ഒരു സ്ത്രീയുടെയും മൃതദേഹം കണ്ടെത്തിയെന്ന വിവരമാണ് ആദ്യം പുറത്ത് വന്നത്. കോട്ടയം രജിസ്ട്രേഷനിലുളള (കെഎല് 05 എയു 9199) വാഹനം കേന്ദ്രീകരിച്ച് നടത്തിയ അന്വേഷണത്തിലാണ് മരിച്ചവരെ തിരിച്ചറിഞ്ഞത്.
തമിഴ്നാട് പൊലീസ് ഫൊറന്സിക് സംഘം സ്ഥലത്തെത്തി കാര് തുറന്ന് പരിശോധിച്ചു. കാറിനുളളില് കീടനാശിനിയുടെ കുപ്പി ലഭിച്ചിട്ടുണ്ട്.
കര്ഷകനായ ജോര്ജ് പി സ്കറിയയ്ക്ക് രണ്ടരക്കോടിയിലേറെ രൂപയുടെ സാമ്പത്തിക ബാധ്യത ഉണ്ടായിരുന്നതായാണ് അയല്വാസി പറയുന്നത്. ബാങ്ക് വായ്പയും സ്വകാര്യ വ്യക്തികളില് നിന്ന് വാങ്ങിയ വായ്പയും ഇതിലുണ്ട്. വീടും സ്ഥലവും വിറ്റ് കടം വീട്ടാന് ശ്രമിച്ചെങ്കിലും ഫലം കണ്ടില്ല. അഖിലിന് ചെറിയ ഒരു തുണിക്കട ഉണ്ടായിരുന്നതിലെ വരുമാനമായിരുന്നു കുടുംബത്തിന്റെ ഏക ആശ്രയം. ജോര്ജ് കര്ഷകനായിരുന്നു.
