വെണ്മണി: ഭീഷണിപ്പെടുത്തി മോഷണം നടത്തി ഒളിവില്‍ കഴിഞ്ഞുവന്ന പ്രതി പതിനാല് വര്‍ഷത്തിനുശേഷം പിടിയില്‍. പാണ്ടനാട് കീഴ്‌വന്‍മഴി മുറിയില്‍ കണ്ടത്തില്‍ പറമ്പില്‍ വീട്ടില്‍ മോഴ ബിനു എന്നു വിളിക്കുന്ന മനോജ് (48) ആണ് വെണ്മണി പോലീസിന്റെ പിടിയിലായത്.
2007 മാര്‍ച്ച് 31ന് ചമ്മത്തുമുക്ക് രക്ഷാസൈന്യം പള്ളിക്ക് സമീപം പാലമേല്‍ മുതുകാട്ടുകര മുറിയില്‍ റെജി കോട്ടേജില്‍ ആര്‍.റ്റി.വര്‍ഗ്ഗീസിനെ മോട്ടോര്‍സൈക്കിള്‍ തടഞ്ഞുനിര്‍ത്തി വടിവാള്‍ കാട്ടി ഭീഷണിപ്പെടുത്തി ഇയാളില്‍ നിന്നും പണവും മൊബൈല്‍ഫോണും, ഒരുപവന്‍ സ്വര്‍ണ്ണമോതിരവും കവര്‍ച്ച ചെയ്ത കേസിലെ നാലു പ്രതികളില്‍ ശിക്ഷ വിധിച്ച ഒന്നാം പ്രതിയാണ് ഇയാള്‍. ഒളിവില്‍ കഴിഞ്ഞിരുന്ന തമിഴ്‌നാട് കോയമ്പത്തൂര്‍ തിരുപ്പൂര്‍ ജില്ലയിലെ അവിനാശി പോലീസ് സ്റ്റേഷന്‍ പരിധിയിലെ ഭാരതി നഗറില്‍ നിന്നുമാണ് ഇയാള്‍ പിടിയിലായത്.
2009ല്‍ ശിക്ഷ വിധിച്ച കേസില്‍ ശിക്ഷ അനുഭവിക്കാതെ ഭാര്യയ്‌ക്കും കുടുംബത്തിനുമൊപ്പം ഇയാള്‍ കേരളത്തിലും, തമിഴ്‌നാട്ടിലും വിവിധ സ്ഥലങ്ങളില്‍ ഒളിവിലായിരുന്നു. പ്രതിക്കെതിരേ മാന്നാര്‍, ചെങ്ങന്നൂര്‍, വീയപുരം, വെണ്മണി എന്നീ പോലീസ് സ്റ്റേഷനുകളില്‍ പിടിച്ചുപറി, മോഷണം, മാരകായുധങ്ങള്‍ കാട്ടി പണം തട്ടിയെടുക്കല്‍ തുടങ്ങിയ കേസ്സുകള്‍ നിലവിലുണ്ടെന്ന് പോലീസ് അറിയിച്ചു.
പ്രതികരിക്കാൻ ഇവിടെ എഴുതുക: