പത്തനംതിട്ട: തിരുവല്ല നിരണം സര്ക്കാര് താറാവ് വളര്ത്തല് കേന്ദ്രത്തില് പക്ഷിപ്പനി സ്ഥിരീകരിച്ചു. ഭോപ്പാലിലെ വൈറോളജി ഇന്സ്റ്റിറ്റ്യൂട്ടാണ് പക്ഷിപ്പനി സ്ഥിരീകരിച്ച് റിപ്പോര്ട്ട് നല്കിയത്.
നിരണം താറാവ് വളര്ത്തല് കേന്ദ്രത്തില് കഴിഞ്ഞയാഴ്ച നിരവധി താറാവുകള് കൂട്ടത്തോടെ ചത്തിരുന്നു. തുടര്ന്നാണ് വൈറോളജി ഇന്സ്റ്റിറ്റ്യൂട്ടില് സാമ്പിളുകള് അയച്ചത്. പക്ഷിപ്പനി സ്ഥിരീകരിച്ചതിനെ തുടര്ന്ന് പ്രതിരോധ നടപടികള് ആരംഭിച്ചതായി പഞ്ചായത്ത് അധികൃതര് അറിയിച്ചു.
തുടര്നടപടികള് ആലോചിക്കുന്നതിനായി തിങ്കളാഴ്ച കളക്ടറുടെ നേതൃത്വത്തില് അവലോകന യോഗം ചേരുമെന്നാണ് വിവരം.
കഴിഞ്ഞദിവസം ആലപ്പുഴ തഴക്കരയിലും പക്ഷിപ്പനി സ്ഥിരീകരിച്ചിരുന്നു. കേരള -തമിഴ്നാട് അതിര്ത്തികളില് പരിശോധന ശക്തമാക്കിയിട്ടുണ്ട്. തമിഴ്നാട് അതിര്ത്തിയായ വാളയാര് ഉള്പ്പെടെചെക്ക് പോസ്റ്റുകളില് മൃഗസംരക്ഷണ വകുപ്പ് സംഘത്തെ നിയോഗിച്ചിട്ടുണ്ട്. തമിഴ്നാട്, ആന്ധ്രാ, കര്ണാടക സംസ്ഥാമനങ്ങളില് നിന്നുളള ചരക്കുവണ്ടികള് ഉള്പ്പെടെ എല്ലാ വാഹനങ്ങളും പരിശോധിച്ച് അണുനാശിനി തളിച്ചാണ് കടത്തിവിടുന്നത്.
