കോഴിക്കോട്: പെയ്തില്ല നിലാവുപോൽ.. പ്രണയത്തിന്റെ നീറ്റലുകൾ ഉള്ളിൽ നിറയ്ക്കുന്ന വരികൾ. ബാവുൽ സംഗീതത്തിന്റെ ഛായയുള്ള, ഗസലിന്റെ മാധുര്യമുള്ള ‘ഇന്നലെ’ എന്ന ഗാനം ശ്രദ്ധേയമാവുകയാണ്. സീറോ ബജറ്റിൽ നിർമിച്ച ഇന്നലെ പൂർണമായും ആൻഡ്രോയ്ഡ് ഫോണിലാണ് ചിത്രീകരിച്ചത്. സപ്ലൈക്കോ ജീവനക്കാരൻ നായകനായ പാട്ടിന് സംഗീത സംവിധാനം നിർവഹിച്ചത് ഒരു പോലീസുകാരനാണ്.
മിസ്റ്റിക് ഫാക്ടറിയുടെ ബാനറിൽ പുറത്തിറങ്ങിയ ഇന്നലെയുടെ നായകൻ ബിജു. ടി. ദേവേന്ദ്രനാണ്. കോഴിക്കോട് ലിങ്ക് റോഡിൽ സപ്ലൈകോയുടെ നെല്ല് സംഭരണ വിഭാഗത്തിൽ അസിസ്റൻ്റ് സെയ്ൽസ്മാനാണ് ബാലുശ്ശേരി തലയാട് തയ്യുള്ളതിൽ ബിജു. ഭാര്യ പി.പി. ദിവ്യ കസബ പോലീസ് സ്റ്റേഷനിലെ സിവിൽ പൊലീസ് ഓഫീസറാണ്. മകൾ നിരഞ്ജന പത്താക്ലാസ് പരീക്ഷയിൽ 9 എ പ്ലസ് നേടിയ അതേ ദിവസമാണ് പാട്ട് പുറത്തിറങ്ങിയത്.
പാട്ടിന് ഈണം ചിട്ടപ്പെടുത്തിയ പ്രശാന്ത് മൽഹാൽ കോഴിക്കോട് സിറ്റി പൊലീസിലെ സ്ക്വാഡ് അംഗമാണ്. അന്വേഷണ മികവിന്ന് മുഖ്യമന്ത്രിയുടെ മെഡൽ ജേതാവാണ്. പാട്ടു പാടിയ ഗായകൻ സൂര്യശ്യാം ഗോപാൽ വർഷങ്ങൾക്കു ശേഷം സിനിമയിലെ മധു പകരൂ, കണ്ണൂർ സ്ക്വാഡിലെ മൃദുഭാവേ ദൃഡ കൃത്യേ തുടങ്ങിയ പാട്ടുകളിൽ കോറസ് പാടിയിട്ടുണ്ട്. ധാർവാഡ് സ്വദേശിയായ ഹിന്ദുസ്ഥാനി ഗായകൻ കുമാർ മർദൂറിന്റെ ശിഷ്യനാണ്.
പേരാമ്പ്ര സ്വദേശിയായ അനാമിക ചന്ദ്രനാണ് ഇന്നലെയിലെ നായിക. മനോരമ തൊഴിൽവീഥിയുടെ വിഷുപ്പതിപ്പിൽ കവർ മോഡലായിരുന്നു. രണ്ടു വർഷം സംസ്ഥാന സ്കൂൾ കലോത്സവത്തിൽ നൃത്ത ഇനങ്ങളിൽ ജേതാവായിരുന്നു. പ്രണയവും വിരഹവും ഉള്ളിൽ തൊടുന്ന വരികൾ എഴുതിയത് ചിത്രകാരനും മാധ്യമപ്രവർത്തകനുമായ മിത്രൻ വിശ്വനാഥനാണ്. ‘ഓള് എന്ന പാട്ടിന് മികച്ച സംവിധായകനുള്ള മലയാള ചലച്ചിത്ര കൂട്ടായ്മയുടെ ജയൻ സ്മാരക പുരസ്കാരം നേടിയിട്ടുണ്ട്. ഇദയം എന്ന പാട്ടിന്റെ ഗാനരചനയ്ക്ക് യുഎഇയിലെ മെഹ്ഫിൽ രാജ്യാന്തര മ്യൂസിക് ഫെസ്റ്റിൽ പുരസ്കാരവും നേടിയിട്ടുണ്ട്.
2005 മുതൽ 2008 വരെ കാലിക്കറ്റ് സർവകശാലാ കലോത്സവത്തിൽ ചിത്ര പ്രതിഭയായിരുന്നു. ദേശീയ അന്തർ സർവകലാശാലാ കലോത്സവത്തിൽ പെയ്ൻ്റിങ് വിഭാഗത്തിൽ വ്യക്തിഗത ചാംപ്യനുമായിരുന്നു. തിരൂർ സ്വദേശിയായ എ.കെ. മെഹറൂഫാണ് നിർമാണ നിർവഹണം.
