ന്യൂദല്ഹി: ബിലീവേഴ്സ് ഈസ്റ്റേണ് ചര്ച്ച് പരമാധ്യക്ഷന് മാര് അത്തനേഷ്യസ് യോഹാന് മെത്രാപ്പൊലീത്തയുടെ ഭൗതികദേഹം ഈ മാസം 20 ന് കേരളത്തിലേക്ക് കൊണ്ടു വരും. തിരുവല്ല സെന്റ് തോമസ് നഗറിലെ ബിലീവേഴ്സ് കണ്വന്ഷന് സെന്ററില് പൊതുദര്ശനത്തിന് വച്ച ശേഷം 21 ന് സെന്റ് തോമസ് ബിലീവേഴ്സ് ഈസ്റ്റേണ് ചര്ച്ച് കത്തീഡ്രലില് കബറടക്കും.
സമയക്രമങ്ങളും മറ്റും പിന്നീട് അറിയിക്കുമെന്ന് ബിലീവേഴ്സ് ഈസ്റ്റേണ് ചര്ച്ച് സിനഡ് അറിയിച്ചു.അത്തനേഷ്യസ് യോഹാന്റെ ഭൗതികദേഹം അമേരിക്കയിലെ ഡാലസ് സിറ്റിയിലെ മെതഡിസ്റ്റ് ആശുപത്രി മോര്ച്ചറിയിലാണ്. നടപടിക്രമങ്ങള് പൂര്ത്തിയാക്കിയാകും ഭൗതിക ദേഹം ഇന്ത്യയിലെത്തിക്കുക.
ടെക്സാസിലെ ഗോസ്പല് ഫോര് ഏഷ്യ ആസ്ഥാനത്തിന് സമീപമുളള റോഡില് പ്രഭാത നടത്തയ്ക്കിടെയാണ് ചൊവ്വാഴ്ച മെത്രാപ്പൊലീത്തയെ വാഹനം ഇടിച്ചത്. ഗുരുതര പരിക്കേറ്റ അദ്ദേഹത്തെ ഡാലസിലെ ആശുപത്രിയില് എത്തിച്ച് ശസ്ത്രക്രിയ നടത്തിയെങ്കിലും ജീവന്രക്ഷിക്കാനായില്ല. ഇടിച്ച വാഹനം പൊലീസ് കസ്റ്റഡിയിലെടുത്തു. മെത്രാപ്പൊലീത്തയുടെ ഭാര്യ ഗിസല്ലയും മക്കളായ ഡാനിയേല്, സാറ എന്നിവരും അമേരിക്കയിലുണ്ട്.
