തിരുവനന്തപുരം: കാട്ടാക്കടയില്‍ ദുരൂഹ സാഹചര്യത്തില്‍ യുവതിയെ മരിച്ച നിലയില്‍ കണ്ടെത്തിയ സംഭവത്തില്‍ സ്വമേധയ കേസെടുത്ത കേരളാ വനിതാ കമ്മീഷന്‍ തിരുവനന്തപുരം റൂറല്‍ പൊലീസ് മേധാവിയോട് അന്വേഷണ പുരോഗതി സംബന്ധിച്ച് റിപ്പോര്‍ട്ട് തേടി.
പേരൂര്‍ക്കട സ്വദേശിനി മായ മുരളിയെയാണ് കഴിഞ്ഞ ദിവസം ഇവര്‍ താമസിക്കുന്ന വാടക വീടിനോട് ചേര്‍ന്ന റബര്‍ തോട്ടത്തില്‍ മരിച്ച നിലയില്‍ കാണപ്പെട്ടത്. കൊലപാതകമാണെന്ന സംശയിക്കുന്നതിനാല്‍ അന്വേഷണം തുടങ്ങിയെങ്കിലും പ്രതിയെ ഇതുവരെ കണ്ടെത്താനായില്ല. മായയുടെ രണ്ടാം ഭര്‍ത്താവ് രഞ്ജിത്തിനെ സംഭവ ദിവസം മുതല്‍ കാണാതായിട്ടുണ്ട്.
മായാ മുരളിയുടെ ആദ്യ ഭര്‍ത്താവ് എട്ടു വര്‍ഷം മുമ്പ് അപകടത്തില്‍ മരിച്ചിരുന്നു. ഒരു വര്‍ഷം മുമ്പാണ് കുടപ്പനക്കുന്ന് സ്വദേശി രഞ്ജിത്തുമായി താമസം തുടങ്ങിയത്. കാട്ടാക്കട മുതിയവിളയില്‍ വാടക വീട്ടിലായിരുന്നു ഇവര്‍ താമസിച്ചിരുന്നത്. ഇതിനിടെയാണ് കഴിഞ്ഞ ദിവസം രാവിലെ യുവതിയുടെ മൃതദേഹം വീടിനോട് ചേര്‍ന്ന റബര്‍ തോട്ടത്തില്‍ കണ്ടെത്തിയത്. കണ്ണിലും നെഞ്ചിലും പരിക്കേറ്റ നിലയിലായിരുന്നു മൃതദേഹം.
മായയും ഭര്‍ത്താവും തമ്മില്‍ വീട്ടില്‍ പതിവായി വഴക്കും ബഹളവും കേട്ടിരുന്നതായി നാട്ടുകാര്‍ പൊലീസിന് മൊഴി നല്‍കി. അജ്ഞാതനായ ഒരാള്‍ ഇടയ്ക്കിടെ ഈ വീട്ടില്‍ വന്നുപോയിരുന്നതായും പൊലീസിന് വിവരം ലഭിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: