കൊച്ചി: മത്സ്യബന്ധനം സുരക്ഷിതമാക്കുന്നതിന് പ്രാദേശിക കാലാവസ്ഥാ പ്രവചനം ഉപയോഗപ്രദമാകുമെന്ന് കൊച്ചി ശാസ്ത്ര സാങ്കേതിക സര്വകലാശാലയും, ഇന്ത്യന് മീറ്റിയറോളജിക്കല് ഡിപ്പാര്ട്ട്മെന്റും യുകെയിലെ സസെക്സ് സര്വകലാശാലയും ചേര്ന്ന് നടത്തിയ പഠനത്തില് കണ്ടെത്തി. ഇത്തരം പ്രവചനങ്ങള് കൊണ്ട് മത്സ്യത്തൊഴിലാളികള്ക്ക് ബോട്ടുകള് സുരക്ഷിതമായ സ്ഥലങ്ങളില് ഇറക്കാനും, കരയ്ക്കടുപ്പിക്കാനും തീരത്തിനടുത്ത് മത്സ്യലഭ്യതയുള്ള സ്ഥലങ്ങള് കണ്ടെത്താനും കാറ്റും കോളുമുള്ള സമുദ്രമേഖലകള് ഒഴിവാക്കാനും മോശമായ കാലാവസ്ഥയില് വേഗത്തില് മടങ്ങാനും സാധിക്കുമെന്ന് കുസാറ്റ് അഡ്വാന്സ്ഡ് സെന്റര് ഫോര് അറ്റ്മോസ്ഫെറിക് റഡാര് റിസര്ച്ച് (എസിഎആര്ആര്) ഡയറക്ടര് പ്രൊഫ. അഭിലാഷ് എസ്. പറഞ്ഞു.
ഐഎംഡിയിലെ സീനിയര് ശാസ്ത്രജ്ഞ ഡോ. വി.കെ. മിനി, എസിഎആര്ആര് ഗവേഷകന് ഡോ. എം. സാരംഗ്, സസെക്സ് കാലാവസ്ഥാ ഗവേഷകന് ഡോ. നെറ്റ്സാനെറ്റ് അലാമിറോ, സസെക്സ് വിസിറ്റിങ് റിസര്ച്ച് ഫെലോയും ബെംഗളൂരു ക്രൈസ്റ്റ് യൂണിവേഴ്സിറ്റി ലൈഫ് സയന്സസ് വകുപ്പിലെ ഫാക്കല്റ്റിയുമായ പ്രൊഫ. മാക്സ് മാര്ട്ടിന് എന്നിവരാണ് പഠനത്തില് ഭാഗമായ മറ്റുള്ളവര്.
തിരുവനന്തപുരത്തിന്റെ തീരപ്രദേശങ്ങള് 2016നും 2021 നും ഇടയില് ഏകദേശം 145 മത്സ്യത്തൊഴിലാളികള് മരണപ്പെട്ടിട്ടുണ്ട്, 2017 നവംബറില് ഓഖി ചുഴലിക്കാറ്റില് 146 പേര് കൂടി മരണമടഞ്ഞു. ഈ സാഹചര്യങ്ങളൊഴിവാക്കാനായി മെച്ചപ്പെട്ട കാലാവസ്ഥാ പ്രവചനങ്ങള് വേണമെന്ന് മത്സ്യത്തൊഴിലാളികള് ഏറെക്കാലമായി ആവശ്യപ്പെടുന്നു.
‘കാലാവസ്ഥാ വ്യതിയാനം കാരണം സമുദ്രങ്ങള്, പ്രത്യേകിച്ച് കിഴക്കന് അറബിക്കടല് അതിവേഗം ചൂടാകുന്നു. ഈ ചൂട് പരമ്പരാഗത മത്സ്യത്തൊഴിലാളികളുടെയും തീരദേശ സമൂഹങ്ങളുടെയും ജീവിതത്തെയും ഉപജീവനത്തെയും ബാധിക്കുന്നുവെന്ന് പ്രൊഫ. അഭിലാഷ് പറഞ്ഞു. ചുഴലിക്കാറ്റുകളും ന്യൂനമര്ദങ്ങളും
പോലുള്ള അവസ്ഥകള് കൂടുതല് തീവ്രമാകുന്നു, അതിനാല് മത്സ്യത്തൊഴിലാളികള്ക്ക് കൂടുതല് അപകടസാധ്യതകള് നേരിടേണ്ടിവരുന്നു.
തിരുവനന്തപുരം ജില്ലയിലെ മത്സ്യത്തൊഴിലാളികളുമായി സസെക്സിന്റെ നേതൃത്വത്തിലുള്ള സുരക്ഷിത മത്സ്യബന്ധന ഗവേഷണ ഫോര്കാസ്റ്റിങ്ങിന്റെ ഫലമാണ് ഈ പ്രബന്ധം. യുകെ റിസര്ച്ച് ആന്ഡ് ഇന്നൊവേഷന്, സസെക്സ് സസ്റ്റൈനബിലിറ്റി റിസര്ച്ച് പ്രോഗ്രാം, റോയല് ജിയോഗ്രഫിക്കല് സൊസൈറ്റി എന്നിവയുടെ പിന്തുണയോടെയാണ് ഗവേഷണം നടത്തിയത്. വെതര് റിസര്ച്ച് ഫോര്കാസ്റ്റിങ് മോഡല് എന്ന സംഖ്യാ കാലാവസ്ഥാ പ്രവചന സംവിധാനം ഉപയോഗിച്ചാണ് പഠനം നടത്തിയത്.
