ബിഗ് ബോസ് മലയാളം ആറാം സീസൺ 9-ാമത്തെ ആഴ്ചയിലേക്കു കടന്നിരിക്കുകയാണ്. ബിഗ് ബോസ് വീടിനകത്തേക്ക് അപ്രതീക്ഷിതമായി ചില അതിഥികൾ വന്നെത്തികൊണ്ടിരിക്കുകയാണ് ഇപ്പോൾ. ആദ്യമെത്തിയത് ആദ്യ സീസണിന്റെ വിജയിയായ സാബുമോൻ ആയിരുന്നു.
ഇപ്പോഴിതാ, സാബുമോനു പിന്നാലെ ആദ്യ സീസണിലെ മത്സരാർത്ഥികളിൽ ഒരാളായ ശ്വേത മേനോനും എത്തിയിരിക്കുകയാണ്. ബിഗ് ബോസിലെ ഐക്കോണിക് ടാസ്കുകളിൽ ഒന്നായ ഹോട്ടൽ ടാസ്കിൽ അതിഥിയായാണ് ഇരുവരും എത്തുന്നത്.
അതിഥിയായാണ് എത്തുന്നതെങ്കിലും വെറുതെ വന്നുപോവുകയല്ല ഈ അതിഥികളുടെ ഉദ്ദേശം. സൂപ്പർ ചലഞ്ചറായി കൂടിയാണ് താൻ എത്തിയതെന്ന സൂചന കഴിഞ്ഞ ദിവസം തന്നെ സാബുമോൻ മത്സരാർത്ഥികൾക്കു നൽകി കഴിഞ്ഞു. സേഫ് ഗെയിം കളിക്കുന്നവരുടെ സ്ട്രാറ്റജികൾ പൊളിച്ച് അടുക്കുക എന്ന ലക്ഷ്യത്തോടെയാണ് ഈ പൂർവ്വ മത്സരാർത്ഥികൾ എല്ലാം ഷോയിലേക്ക് എത്തുന്നത്.
സാബുമോൻ കഴിഞ്ഞ ദിവസം ബിഗ് ബോസ് വീടിനകത്ത് ഒരുക്കിയ പ്രാങ്ക് ഒടുവിൽ കൂട്ടവഴക്കിലാണ് കലാശിച്ചത്. നോറയെ ട്രിഗർ ചെയ്യുക എന്നതായിരുന്നു സാബുമോൻ അപ്സരയും നന്ദനയും ശരണ്യയും സായിയും ഉൾപ്പെടുന്ന ടീമിനു നൽകിയ നിർദ്ദേശം. ടീം അതു വിജയകരമായി തുടങ്ങിവച്ചെങ്കിലും ആ ചൂണ്ടയിൽ കൊത്തി ട്രിഗർ ആയത് ഋഷിയാണ്. സാബുമോന്റെ ഇത്തരത്തിലുള്ള പ്രാങ്കുകളും മൈൻഡ് ഗെയിമുകളും വീടിനകത്ത് എന്തൊക്കെ മാറ്റങ്ങൾ ഉണ്ടാക്കുമെന്ന് കണ്ടറിയാം.
അതേസമയം, ശ്വേത ബിഗ് ബോസ് വീട്ടിൽ എത്തിയ ഉടനെ തനിക്ക് പവർ റൂം വേണം താമസിക്കാൻ എന്നാണ് മത്സരാർത്ഥികളോട് ആവശ്യപ്പെടുന്നത്. ബിഗ് ബോസ് വീട്ടിലെ പവർ റൂമിൽ പവർ ടീം അല്ലാതെ മറ്റാരും കയറരുതെന്ന് റൂളുണ്ട്. അതിനാൽ തന്നെ, ശ്വേതയുടെ നിർബന്ധത്തെ പവർ ടീം എങ്ങനെ ഹാൻഡിൽ ചെയ്യുമെന്ന് കണ്ടറിയണം. ഹോട്ടൽ ടാസ്കിൽ അതിഥിയായി എത്തിയ ശ്വേതയെ പിണക്കാനും ആവില്ല, പവർ റൂം റൂൾ ബ്രേക്ക് ചെയ്യാനുമാവില്ല. എങ്ങനെ ഈ പ്രതിസന്ധി മത്സരാർത്ഥികൾ ഡീൽ ചെയ്യുമെന്നതാണ് ഇന്നത്തെ എപ്പിസോഡിന്റെ ഹൈലൈറ്റ്.
