ന്യൂദല്ഹി: മുംബൈ ഭീകരാക്രമണവുമായി ബന്ധപ്പെട്ട് പാകിസ്ഥാനെ വെള്ള പൂശുന്ന പ്രസ്താവന നടത്തിയ മഹാരാഷ്ട്രയിലെ കോണ്ഗ്രസ് നേതാവ് വിജയ് വാദേടിവാറിനെ പിന്തുണച്ച് ശശി തരൂര് എംപി. വിജയ് വാദേടിവാറിന്റെ ആരോപണത്തെക്കുറിച്ച് അന്വേഷണം വേണമെന്ന് ശശി തരൂര് ആവശ്യപ്പെട്ടു. സമയം വൈകിയിട്ടില്ല, യഥാര്ത്ഥത്തില് എന്താണ് സംഭവിച്ചതെന്ന് അറിയാന് രാജ്യത്തിന് അവകാശമുണ്ട്. ആരോപണം ശരിയാണെന്നല്ല, അന്വേഷിക്കണമെന്നാണ് ആവശ്യമെന്നും ശശി തരൂര് പ്രതികരിച്ചു.
ഭീകരാക്രമണത്തിനിടെ പോലീസ് ഉദ്യോഗസ്ഥന് ഹേമന്ത് കര്ക്കറെയെ കൊലപ്പെടുത്തിയത് അജ്മല് കസബ് അല്ലെന്നും ആര്എസ്എസ് ബന്ധമുള്ള പോലീസ് ഉദ്യോഗസ്ഥനാണെന്നുമായിരുന്നു മഹാരാഷ്ട്രയിലെ കോണ്ഗ്രസ് നേതാവ് വിജയ് വാദേടിവാറിന്റെ വിവാദ പ്രസ്താവന. മുംബൈ ഭീകരാക്രമണത്തില് പാകിസ്ഥാന് ക്ലീന്ചിറ്റ് നല്കുന്ന നടപടിയാണ് കോണ്ഗ്രസില് നിന്നുണ്ടായിരിക്കുന്നതെന്ന് ബിജെപി കുറ്റപ്പെടുത്തി. സംഭവം വിവാദമായതോടെ പ്രസ്താവന തിരുത്തി കോണ്ഗ്രസ് നേതാവ് രംഗത്തെത്തി. താന് കര്ക്കറെയുടെ മരണത്തെപ്പറ്റി പറഞ്ഞത് ഒരു ബുക്കിലെ കാര്യമാണെന്നായിരുന്നു ന്യായീകരണം.
