കൊച്ചി: സ്വകാര്യസന്ദര്ശനത്തിനായി മുഖ്യമന്ത്രി പിണറായി വിജയന് ദുബായിലേക്ക് യാത്രതിരിച്ചു. ഇന്ന് പുലര്ച്ചെ നെടുമ്പാശ്ശേരിയില് നിന്നാണ് അദ്ദേഹം ദുബായിലേക്ക് പോയത്. മന്ത്രി മുഹമ്മദ് റിയാസും ഭാര്യ വീണാ വിജയനും ദുബായിലേക്ക് പുറപ്പെട്ടിട്ടുണ്ട്.
ഇന്നലെയാണ് മുഖ്യമന്ത്രിയുടെ യാത്രയ്ക്ക് കേന്ദ്ര സര്ക്കാരിന്റെ അനുമതി ലഭിച്ചത്. വിനോദയാത്രയെന്നാണ് കേന്ദ്ര ആഭ്യന്തര മന്ത്രാലയത്തെ അറിയിച്ചിരിക്കുന്നത്. മന്ത്രി മുഹമ്മദ് റിയാസും ഭാര്യ വീണ വിജയനും നാല് ദിവസം മുമ്പ് വിദേശത്തേക്ക് യാത്ര തിരിച്ചിരുന്നു. യുഎഇയിലേക്കായിരുന്നു ഇവരുടെ ആദ്യ യാത്ര. ഇന്ന് ഇരുവരും ഇന്തോനേഷ്യയിലെത്തും.വിവിധ ടൂറിസ്റ്റ് കേന്ദ്രങ്ങള് സന്ദര്ശിക്കാനുള്ള സ്വകാര്യ യാത്രയെന്നാണ് മന്ത്രി മുഹമ്മദ് റിയാസും അറിയിച്ചിരിക്കുന്നത്.
19 ദിവസത്തേക്കാണ് റിയാസിന് യാത്രാ അനുമതി. മേയ് 21ന് ശേഷം അദ്ദേഹവും കുടുംബവും നാട്ടിലേക്ക് മടങ്ങുമെന്നാണ് സൂചന. മുഖ്യമന്ത്രി ഔദ്യോഗിക ആവശ്യത്തിനായി വിദേശത്തേക്ക് പോകുന്ന വേളകളില് സര്ക്കാര്തന്നെ യാത്രസംബന്ധിച്ച് വാര്ത്താക്കുറിപ്പ് ഇറക്കുകയാണ് പതിവ്. സ്വകാര്യസന്ദര്ശനമായതിനാല് ഇത്തവണ ഔദ്യോഗിക അറിയിപ്പുണ്ടായിട്ടില്ല.
അതേസമയം മുഖ്യമന്ത്രി പിണറായി വിജയന്റെ വിദേശ യാത്രാ ഉദ്ദേശം വ്യക്തമാക്കണമെന്ന് കോണ്ഗ്രസ് നേതാവ് കെ. മുരളീധരന്. സംസ്ഥാനത്തെ ഭരണത്തലവനാണ് പിണറായി വിജയന്. പൊതുപ്രവര്ത്തകര്ക്ക് രഹസ്യമില്ല. മുഖ്യമന്ത്രി എന്ത് ആവശ്യത്തിനാണ് വിദേശത്തേക്ക് പോയതെന്ന് വിശദീകരിക്കണം. ഔദ്യോഗിക യാത്രയല്ല. സ്വകാര്യ സന്ദര്ശനമെന്ന പേരില് മൂന്ന് രാജ്യങ്ങളില് പോകുന്നത് ഉചിതമല്ലെന്നും മുരളീധരന് കൂട്ടിച്ചേര്ത്തു.
