ഇന്ത്യയുടെ പുരുഷ- വനിതാ ടീമുകള്‍ക്ക് പാരീസ് ഒളിംപിക്സ് യോഗ്യത; പുരുഷ ടീമില്‍ മൂന്ന് മലയാളികളും

ന്യൂദല്‍ഹി: മൂന്ന് മലയാളികള്‍ ഉള്‍പ്പെട്ട ഇന്ത്യയുടെ 4×400 മീറ്റര്‍ റിലേയിൽ പുരുഷ -വനിതാ ടീമുകൾ ഈ വര്‍ഷത്തെ പാരീസ് ഒളിംപിക്സിന് യോഗ്യത നേടി. മലയാളികളായ മുഹമ്മദ്‌ അനസ് യഹിയ, അമോജ് ജേക്കബ്, മുഹമ്മദ്‌ അജ്മൽ എന്നിവര്‍ക്ക് പുറമെ തമിഴ്നാടിന്റെ ആരോഗ്യരാജീവും ഉള്‍പ്പെട്ട പുരുഷ ടീം ആണ് യോഗ്യത നേടിയത്.

3 മിനിറ്റ് 3.23 സെക്കന്‍ഡിലാണ് പുരുഷ ടീം ഫിനിഷ് ചെയതാണ് ഇന്ത്യൻ പുരുഷ റിലേ ടീം പാരീസ് ഒളിംപിക്സ് യോഗ്യത ഉറപ്പാക്കിയത്. 2 മിനിറ്റ് 59.95 സെക്കന്‍ഡില്‍ ഫിനിഷ് ചെയ്ത അമേരിക്കയാണ് ഒന്നാം സ്ഥാനത്ത്. വനിതകളില്‍ രൂപാല്‍ ചൗധരി, എം ആര്‍ പൂവമ്മ, ജ്യോതിക ശ്രി ദണ്ഡി, ശുഭ വെങ്കടേശന്‍ എന്നിവരടങ്ങിയ സംഘമാണ് ഒളിംപിക്സ് യോഗ്യത നേടിയത്. 3 മിനിറ്റ് 29.35 സെക്കന്‍ഡിലാണ് വനിതാ ടീം ഫിനിഷ് ചെയ്തത്. 3 മിനിറ്റ് 28.54 സെക്കന്‍ഡില്‍ ഫിനിഷ് ചെയ്ത ജമൈയ്‌ക്കയാണ് ഒന്നാമത്. ആദ്യ റൗണ്ടിൽ വനിത ടീം അഞ്ചാം സ്ഥാനത്തായിരുന്നു.

വേൾഡ് അത്ലറ്റിക്സ് റിലേസ് രണ്ടാം റൗണ്ട് ഹീറ്റ്സിൽ രണ്ടാമതായി ഇന്ത്യയുടെ പുരുഷ-വനിതാ ടീമുകൾ ഫിനിഷ് ചെയ്തതോടെയാണ് യോഗ്യത ഉ റപ്പിച്ചത്. രണ്ടാം റൗണ്ടിലെ മൂന്ന് ഹീറ്റ്സിലും ആദ്യ രണ്ട് സ്ഥാനത്ത് എത്തുന്നവർക്കാണ് യോഗ്യത ലഭിക്കുന്നത്. ജൂലൈ 26 മുതല്‍ ഓഗസ്റ്റ് 11വരെ പാരീസിലാണ് ഒളിംപിക്സ്. റിലേയിലെ പുരുഷ-വനിതാ ടീമുകൾ യോഗ്യത ഉറപ്പാക്കിയതോടെ പാരീസ് ഒളിംപിക്സിൽ മത്സരിക്കാനുള്ള ഇന്ത്യൻ ട്രാക്ക് ആന്‍ഡ് ഫീല്‍ഡ് താരങ്ങളുടെ എണ്ണം 19 ആയി ഉയർന്നു.