ന്യൂദല്ഹി: ”എനിക്കൊന്നേ അദ്ദേഹത്തോട് പറയാനുള്ളൂ; ഭയക്കരുത്, ഒളിച്ചോടരുത്”, റായ്ബറേലിയിലേക്കു മാറിയ രാഹുലിന്റെ തീരുമാനത്തെ പരാമര്ശിച്ച് പ്രധാനമന്ത്രി നരേന്ദ്ര മോദി പറഞ്ഞു. ബംഗാളിലെ ബര്ധമാനില് തെരഞ്ഞെടുപ്പു പ്രചാരണ റാലിയിലാണ് സുരക്ഷിത മണ്ഡലം നോക്കിയുള്ള രാഹുലിന്റെ ചാട്ടത്തെ മോദി പരാമര്ശിച്ചത്.
അന്വേഷണ ഏജന്സികളെ ഉപയോഗിച്ച് ബിജെപി പ്രതിപക്ഷത്തെ ഭയപ്പെടുത്തുന്നു എന്നാരോപിച്ച് രാഹുല് ഉപയോഗിച്ച വാക്കാണ് ഡരോ മത് (ഭയക്കരുത്). അമേഠിയില് നിന്നു റായ്ബറേലിയിലേക്കുള്ള രാഹുലിന്റെ ഒളിച്ചോട്ടത്തെ അതേ വാക്കുപയോഗിച്ചുതന്നെ മോദി വിശേഷിപ്പിച്ചു.
വയനാട്ടില് രാജകുമാരന് പരാജയപ്പെടുമെന്നാണ് താന് കേട്ടതെന്നും അതാണ് മൂന്നാം മണ്ഡലമായി റായ്ബറേലിയിലേക്കു പോകുന്നതെന്നും മോദി പറഞ്ഞു. അമേഠിയില് വിജയിക്കില്ലെന്ന് ഉറപ്പായതോടെയാണ് മറ്റൊരിടം കണ്ടെത്തിയത്. ഭയന്നോടുന്ന ഇത്തരം ആളുകളാണ് ഭയക്കരുതെന്ന മുദ്രാവാക്യങ്ങളൊക്കെ ഉയര്ത്തി തെറ്റിദ്ധാരണ സൃഷ്ടിക്കുന്നതെന്നും പ്രധാനമന്ത്രി കുറ്റപ്പെടുത്തി.
