തിരുവനന്തപുരം : ഡ്രൈവര്‍ യദു മേയര്‍ ആര്യാ രാജേന്ദ്രന് നേരെ ലൈംഗിക ചേഷ്ട കാണിച്ചോയെന്ന് അറിയില്ലെന്ന് ബസിലെ കണ്ടക്ടറായിരുന്ന സുബിന്റെ മൊഴി .താന്‍ ഒന്നും കണ്ടിട്ടില്ലെന്നാണ് കണ്ടക്ടര്‍ പറഞ്ഞത്. പിന്‍ സീറ്റിലായിരുന്നതിനാല്‍ കാര്യങ്ങള്‍ തനിക്ക് വ്യക്തമായിരുന്നില്ലെന്നും ബസ് കാറിനെ ഓവര്‍ടേക്ക് ചെയ്തോയെന്ന് അറിയില്ലെന്നും പൊലീസിനോട് സുബിന്‍ വെളിപ്പെടുത്തി.
ബസ് സാഫല്യം കോംപ്ലക്സിന് മുന്നില്‍ വച്ച് തടഞ്ഞപ്പോള്‍ മാത്രമാണ് സംഭവങ്ങള്‍ അറിയുന്നതെന്നാണ് സുബിന്റെ മൊഴി. സംഭവം ഉണ്ടായ ദിവസം അര്‍ദ്ധരാത്രിയോടെ കണ്ടക്ടര്‍ തന്നെ ഫോണില്‍ വിളിച്ച് ഉണ്ടായ കാര്യം പറഞ്ഞിരുന്നുവെന്ന് കഴിഞ്ഞ ദിവസം ഡി വൈ എഫ്ഐ അഖിലേന്ത്യാ അധ്യക്ഷനും എം പിയുമായ എ എ റഹിം പറഞ്ഞത്. ആര്യയുടെ ഭര്‍ത്താവ് സച്ചിന്‍ദേവ് കെ എസ് ആര്‍ ടി സി ബസിനുളളില്‍ കയറിയെന്നും റഹിം സ്ഥിരീകരിച്ചിരുന്നു.
അതിനിടെ, കെഎസ്ആര്‍ടിസി ബസിലെ ക്യാമറ ദൃശ്യങ്ങള്‍ ഉളള മെമ്മറി കാര്‍ഡ് കാണാതായ സംഭവത്തില്‍ പൊലീസ് അന്വേഷണം ഊര്‍ജിതമാക്കി. തമ്പാനൂര്‍ ബസ് ടെര്‍മിനലില്‍ വച്ചാണ് മെമ്മറി കാര്‍ഡ് നഷ്ടമായതെന്നാണ് പൊലീസിന്റെ പ്രാഥമിക നിഗമനം.
പ്രതികരിക്കാൻ ഇവിടെ എഴുതുക: