ന്യൂദല്ഹി: ചന്ദ്രന്റെ ധ്രുവപ്രദേശങ്ങളിൽ വെള്ളത്തിന്റെ സാന്നിധ്യം കണ്ടെത്തിയെന്ന് ഐഎസ്ആര്ഒ. ധ്രുവപ്രദേശങ്ങള് പരിശോധിച്ചപ്പോള് ഉപരിതലത്തിനടയില് ഉപരിതലത്തിലുള്ളതിനേക്കാള് കൂടുതല് വെള്ളം മഞ്ഞുകട്ടകളായി സ്ഥിതിചെയ്യുന്നു. ആദ്യത്തെ രണ്ട് മീറ്ററുകളിലെ ഭൂഗര്ഭ ഹിമത്തിന്റെ അളവ് ഇരുധ്രുവങ്ങളിലെയും ഉപരിതലത്തെക്കാള് അഞ്ച് മുതല് എട്ട് മടങ്ങ് വരെ വലുതാണെന്ന് അടുത്തിടെ നടന്ന പഠനം സൂചിപ്പിക്കുന്നു. ഈ കണ്ടെത്തല് ഐഎസ്ആര്ഒയുടെ ഭാവി ചാന്ദ്രപര്യവേക്ഷണ പദ്ധതികള്ക്ക് അനുഗ്രഹമാകും.
ഐഐടി കാന്പൂര്, യൂണിവേഴ്സിറ്റി ഓഫ് സതേണ് കാലിഫോര്ണിയ, ജെറ്റ് പ്രൊപ്പല്ഷന് ലബോറട്ടറി, ഐഐടി ധന്ബാദ് എന്നിവിടങ്ങളിലെ ഗവേഷകരുമായി സഹകരിച്ച് സ്പേസ് ആപ്ലിക്കേഷന് സെന്റര് ഐഎസ്ആര്ഒയിലെ ശാസ്ത്രജ്ഞരാണ് പഠനം നടത്തിയത്.വടക്കന് ധ്രുവമേഖലയിലെ വാട്ടര് ഐസിന്റെ വ്യാപ്തി ദക്ഷിണ ധ്രുവമേഖലയെക്കാളും ഇരട്ടിയാണെന്നും പഠനം സൂചിപ്പിക്കുന്നു.
ചന്ദ്രനിലെ വാട്ടര് ഐസിന്റെ ഉത്ഭവവും വിതരണവും മനസിലാക്കാന് ലൂണാര് റിക്കണൈസന്സ് ഓര്ബിറ്ററില് റഡാര്, ലേസര്, ഒപ്ടിക്കല്, ന്യൂട്രോണ് സ്പെക്ട്രോമീറ്റര്, അള്ട്രാ വയലറ്റ് സ്പ്ക്ട്രോമീറ്റര്, തെര്മല് റേഡിയോമീറ്റര് എന്നിവ ഉള്പ്പെടുന്ന ഏഴ് ഉപകരണങ്ങള് ഗവേഷകര് ഉപയോഗിച്ചു.
