കോൺഗ്രസ് പാക്കിസ്ഥാന്റെ ശിഷ്യൻ ; ഷെഹ്‌സാദയെ ഇന്ത്യയുടെ അടുത്ത പ്രധാനമന്ത്രിയാക്കാൻ അയൽ രാജ്യം ആകാംക്ഷയിലാണെന്നും മോദി

ആനന്ദ് : കോൺഗ്രസ് പാർട്ടിയെ പാകിസ്ഥാന്റെ ശിഷ്യൻ എന്ന് വിശേഷിപ്പിച്ച് പ്രധാനമന്ത്രി നരേന്ദ്ര മോദി. ഷെഹ്‌സാദയെ ഇന്ത്യയുടെ അടുത്ത പ്രധാനമന്ത്രിയാകാൻ അയൽ രാജ്യമായ പാക്കിസ്ഥാൻ ആഗ്രഹിക്കുന്നുവെന്ന് രാഹുൽ ഗാന്ധിയെ ലക്ഷ്യമിട്ട് അദ്ദേഹം പരിഹസിച്ചു. ആനന്ദ്, ഖേഡ ലോക്‌സഭാ സീറ്റുകളിലേക്കുള്ള ഭാരതീയ ജനതാ പാർട്ടിയുടെ സ്ഥാനാർത്ഥികളെ പിന്തുണച്ച് സെൻട്രൽ ഗുജറാത്തിലെ ആനന്ദ് പട്ടണത്തിൽ നടന്ന മെഗാ തിരഞ്ഞെടുപ്പ് റാലിയെ അഭിസംബോധന ചെയ്തുകൊണ്ട് സംസാരിക്കുകയായിരുന്നു അദ്ദേഹം.

പാക്കിസ്ഥാനിലെ ഇമ്രാൻ ഖാന്റെ മന്ത്രിസഭയിലെ മുൻ മന്ത്രി ചൗധരി ഫവാദ് ഹുസൈൻ തന്റെ സോഷ്യൽ മീഡിയ ഹാൻഡിൽ രാഹുൽ ഗാന്ധിയെ പ്രകീർത്തിക്കുന്ന വീഡിയോ പങ്കുവെച്ചതിന് തൊട്ടുപിന്നാലെയാണ് കോൺഗ്രസിനെ പാകിസ്ഥാനുമായി ബന്ധിപ്പിച്ച് മോദിയുടെ പരാമർശം.

“കോൺഗ്രസ് ഇവിടെ മരിക്കുന്നത് കൊണ്ടാണ് പാകിസ്ഥാൻ കരയുന്നത്. പാകിസ്ഥാൻ നേതാക്കൾ ഇപ്പോൾ കോൺഗ്രസിന് വേണ്ടി പ്രാർത്ഥിക്കുന്നുവെന്ന് നിങ്ങൾ എല്ലാവരും മനസ്സിലാക്കിയിരിക്കണം. ‘ഷെഹ്സാദ’ (രാഹുൽ ഗാന്ധിയെ പരാമർശിച്ച്) അടുത്ത പ്രധാനമന്ത്രിയാക്കാൻ പാകിസ്ഥാൻ ഉത്സുകരാണ്. ഇത് ഞങ്ങൾക്ക് നേരത്തെ തന്നെ അറിയാവുന്നതിനാൽ അതിശയിക്കാനില്ല. കോൺഗ്രസ് പാക്കിസ്ഥാന്റെ ‘മുരീദ്’ (അനുയായി) ആണെന്നും അദ്ദേഹം പറഞ്ഞു.

ഇതിനു പുറമെ പാകിസ്ഥാനും കോൺഗ്രസും തമ്മിലുള്ള പങ്കാളിത്തം ഇപ്പോൾ പൂർണ്ണമായും തുറന്നുകാട്ടപ്പെട്ടിരിക്കുന്നു. രാജ്യത്തിന്റെ ശത്രുക്കൾക്ക് ഇന്ത്യയിൽ വേണ്ടത് ദുർബലമായ സർക്കാരാണ്, ഉദാഹരണത്തിന് 26/11 മുംബൈ ഭീകരാക്രമണ സമയത്ത് ഉണ്ടായിരുന്ന ദുർബലമായ സർക്കാരാണ്. 2014-ന് മുമ്പ് ഉണ്ടായിരുന്ന അഴിമതി നിറഞ്ഞ സർക്കാരാണ് അവർക്ക് വേണ്ടത്. എന്നാൽ മോദിയുടെ ശക്തമായ സർക്കാർ തലകുനിക്കുകയോ നിർത്തുകയോ ചെയ്യുന്നില്ലെന്നും പ്രധാനമന്ത്രി കൂട്ടിച്ചേർത്തു.

മുൻകാലങ്ങളിൽ കോൺഗ്രസ് അധികാരത്തിലിരുന്നതിൽ നിന്ന് വ്യത്യസ്തമായി ഇപ്പോൾ പാകിസ്ഥാൻ ഭീകരതയുടെ ടയറുകൾ പഞ്ചറായിയെന്നും അദ്ദേഹം പറഞ്ഞു. പണ്ട് ഭീകരത കയറ്റുമതി ചെയ്തിരുന്ന ഒരു രാജ്യം ഇപ്പോൾ ആട്ട (മാവ്) ഇറക്കുമതി ചെയ്യാൻ പാടുപെടുകയാണ്. ബോംബുകൾ പിടിച്ചിരുന്ന കൈകൾ ഇപ്പോൾ ‘ഭീഖ് കാ കതോര’ (ഭിക്ഷാപാത്രം) പിടിക്കുന്നുവെന്നും അദ്ദേഹം പറഞ്ഞു.

ലോകമെമ്പാടുമുള്ള ആളുകൾ ഇപ്പോൾ പറയുന്നത് ഇന്ത്യ ഒരു ആഗോള തിളക്കമുള്ള സ്ഥലമാണെന്ന്. രണ്ട് രാജ്യങ്ങൾ തമ്മിലുള്ള സംഘർഷങ്ങൾ പരിഹരിക്കാൻ കഴിയുന്ന ‘വിശ്വബന്ധു’ (ആഗോള സുഹൃത്ത്) ആയാണ് ഇന്ത്യയെ കാണുന്നതെന്നും മോദി പറഞ്ഞു.