നിതേഷ് തിവാരിയുടെ ‘രാമായണ’ത്തില്‍ രണ്‍ബീര്‍ കപൂര്‍ രാമനായും സായ് പല്ലവി സീതയായും അഭിനയിക്കന്നു. രണ്‍ബീറും സായിയും ആദ്യമായാണ് ഒന്നിച്ച് അഭിനയിക്കുന്നത്. ഇരുവരുടെയും ഫസ്റ്റ് ലുക്ക് പോസ്റ്ററും പുറത്തുവന്നു. മലയാളത്തില്‍ പ്രേമം സിനിമയില്‍ മലര്‍ മിസ് ആയി പ്രേക്ഷകരെ ഹരം കൊള്ളിച്ച നടിയാണ് സായ് പല്ലവി. രാമന്റെ വേഷം ചെയ്യുന്ന രണ്‍ബീര്‍ കപൂര്‍ കര്‍ശനമായ വെജിറ്റേറിയന്‍ ഡയറ്റാണ് പിന്തുടരുന്നത്. ഷൂട്ടിംഗിന് മുന്നോടിയായി കര്‍ശനമായ ഫിറ്റ്‌നസ് കാത്തുസൂക്ഷിക്കാനുള്ള പരിശ്രമങ്ങളിലാണ് അദ്‌ദേഹം. അമ്പെയ്‌ത്ത് പരിശീലനവും നേടി.
എഴുന്നൂറു കോടി ചെലവില്‍ നിര്‍മ്മിക്കുന്ന പുതിയ രാമായണത്തില്‍ കെജിഎഫ് നടന്‍ യഷ് ആണ് രാവണനായി എത്തുന്നത്. രാമാനന്ദ് സാഗറിന്റെ രാമായണത്തില്‍ രാമനായി അഭിനയിച്ച അരുണ്‍ ഗോവിലാണ് ദശരഥ രാജാവ്. കൈകേയിയായി അഭിനയിക്കുന്ന ലാറ ദത്തയ്‌ക്കൊപ്പമുള്ള അരുണ്‍ ഗോവിലിന്റെ ചിത്രവും കഴിഞ്ഞ മാസം പുറത്തുവന്നിരുന്നു.
ചിത്രങ്ങള്‍ ചോരാതിരിക്കാനായി ‘രാമായണ’ത്തിന്റെ സെറ്റില്‍ നിതേഷ് തിവാരി മൊബൈല്‍ ഫോണ്‍ വിലക്കിയെന്നും ജീവനക്കാരുടെ പ്രവേശനം നിയന്ത്രിച്ചുവെന്നും വാര്‍ത്തയുണ്ടായിരുന്നു. എന്നാല്‍ സോഷ്യല്‍ മീഡിയയില്‍ ചിത്രങ്ങള്‍ ചോര്‍ന്നു. സൂം ടിവിയാണ് ചിത്രങ്ങള്‍ വാങ്ങിയതെന്നും അവരുടെ സോഷ്യല്‍ മീഡിയ ഹാന്‍ഡിലുകളിലൂടെയാണ് ചിത്രങ്ങള്‍ പുറത്തുവന്നതെന്നും പറയുന്നുണ്ട്.
പ്രതികരിക്കാൻ ഇവിടെ എഴുതുക: