തിരുവനന്തപുരം: ആഗോള സമ്പദ് വ്യവസ്ഥയില്‍ നിര്‍മ്മിത ബുദ്ധിയുടെ (എഐ) സ്വാധീനം പത്ത് വര്‍ഷത്തിനുള്ളില്‍ 7 ട്രില്യണ്‍ മുതല്‍ 15 ട്രില്യണ്‍ ഡോളര്‍ വരെയാകുമെന്ന് ഡിജിമെന്റേഴ്‌സ് സിഇഒയും സഹസ്ഥാപകനുമായ ശ്രീനിവാസന്‍. ജപ്പാനും യുഎസും ആയിരിക്കും ഇക്കാര്യത്തില്‍ മുന്‍പന്തിയിലെത്തുകയെന്നും അദ്ദേഹം പറഞ്ഞു.
‘എ.ഐ: ബിയോണ്‍ണ്ട് ദി ഹൈപ്പ് ആന്‍ഡ് ബാക്ക് ലാഷ്’ എന്ന വിഷയത്തില്‍ ടെക്‌നോപാര്‍ക്കിലെ ഐടി സൊല്യൂഷന്‍ പ്രൊവൈഡര്‍ കമ്പനിയായ റിഫഌക്ഷന്‍സ് ഇന്‍ഫോ സിസ്റ്റംസ് സംഘടിപ്പിച്ച പ്രഭാഷണ പരിപാടിയില്‍ പങ്കെടുക്കുകയായിരുന്നു അദ്ദേഹം.
എഐ അധിഷ്ഠിത ജോലികളില്‍ ഭൂരിഭാഗവും ജപ്പാനും യുഎസും കൈയടക്കുമ്പോള്‍ ഇന്ത്യയ്‌ക്കും ചൈനയ്‌ക്കും അതിന്റെ ശതമാനം കുറവായിരിക്കും. തിരിച്ചടി പ്രതീക്ഷിച്ചുകൊണ്ടു വേണം നിര്‍മ്മിത ബുദ്ധിയെ കുറിച്ച് ചിന്തിക്കാന്‍. എ ഐയുടെ ആഘാതം എല്ലാ വ്യവസായങ്ങളെയും സാമ്പത്തികമായടക്കം സ്വാധീനിക്കും. എഐ കമ്പനികള്‍ നിര്‍മ്മിത ബുദ്ധി പ്രശ്‌നങ്ങള്‍ പരിഹരിക്കില്ല. മനുഷ്യരും യന്ത്രങ്ങളും തമ്മിലുള്ള പോരാട്ടത്തില്‍ മനുഷ്യന്റെ സംഘശക്തി തന്നെ വിജയിക്കും.
ഭാവിയില്‍ നിര്‍മ്മിത ബുദ്ധിയുടെ പ്രതികൂല ആഘാതത്തെ ചെറുക്കുന്നതിന് ആഗോളതലത്തില്‍ ടെക്‌നോപാര്‍ക്കില്‍ നിന്നുള്ള കമ്പനികള്‍ക്ക് സുപ്രധാന പങ്ക് വഹിക്കാനാകുമെന്നും അദ്ദേഹം ആത്മവിശ്വാസം പ്രകടിപ്പിച്ചു. മുന്‍ അംബാസഡര്‍ ടി.പി. ശ്രീനിവാസന്‍, റിഫഌക്ഷന്‍സ് ഇന്‍ഫോ സിസ്റ്റംസ് സിഇഒ ദീപ സരോജമ്മാള്‍ എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: