തിരുവനന്തപുരം: വീരവാദങ്ങളോടെ ആരംഭിക്കുന്ന ടൂറിസം പദ്ധതികള് തകര്ന്നടിയുന്നത് തുടര്ക്കഥയാകുന്നു. വര്ക്കലയിലെ ഫ്ളോട്ടിംബ്രിഡ്ജ് അപകടത്തിനു പിന്നാലെ ടൂറിസം വികസന പദ്ധതിയുടെ ഭാഗമായി ടൂറിസം വകുപ്പ് കൊട്ടിഘോഷിച്ച് ആക്കുളം വിനോദ സഞ്ചാര കേന്ദ്രത്തില് നിര്മ്മിച്ച കണ്ണാടി പാലവും തകര്ന്നു. ആര്ഭാടത്തോടെ ഉദ്ഘാടനത്തിനൊരുങ്ങവെയാണ് പാലം തകര്ന്നത്. ആരും കയറാതെതന്നെ കണ്ണാടി തര്ന്നതില് ദുരൂഹത. ഉദ്ഘാഘാടനം കഴിഞ്ഞ് ആള്ക്കാര് കയറവെയാണ് ഈ തകര്ച്ചയുണ്ടായതെങ്കില് ആളപായം ഉള്പ്പെടെ വന് അപകടം തന്നെ ഉണ്ടാകുമായിരുന്നു.
പാലത്തിലേയ്ക്ക് കയറുന്ന ഭാഗത്താണ് ഗ്ലാസ്സ് തകര്ന്നത്. ഭാരം കൂടിയ ഏതെങ്കിലും വസ്തു ഗ്ലാസ്സിന് മീതെ വീഴാനുള്ള സാഹചര്യവുമില്ല. ആരും ഇവിടേയ്ക്ക് കയറിയതായും വിവരമില്ല. ഇതേസാഹചര്യത്തില് പാലത്തിലെ കണ്ണാടി തകര്ന്നതോടെ കണ്ണാടിയുടെ ഗുണനിലവാരം ചോദ്യം ചെയ്യപ്പെടുകയാണ്. സാഹസിക വിനോദം ലക്ഷ്യമിട്ട് 75 അടി ഉയരവും 52 മീറ്റര് നീളത്തിലുമാണ് കണ്ണാടി പാലം നിര്മ്മിച്ചത്. ചൈന മാതൃകയില് എല്ഇഡി സ്ക്രീന് ഉപയോഗിച്ച് പാലത്തിലേയ്ക്ക് കയറുമ്പോള് ശബ്ദത്തോടെ ചില്ല് തകരുന്ന കാഴ്ചയും പാലത്തിനുണ്ട്. ഒരേ സമയം 20 പേര്ക്ക് പാലത്തില്ക്കൂടി സഞ്ചരിക്കാനും കഴിയും.
കഴിഞ്ഞ മാര്ച്ച് 13 ന് ഇത് ഉദ്ഘാടനം ചെയ്യണ്ടതായായിരുന്നു. എന്നാല് വര്ക്കലയില് ഫ്ലോട്ടിംഗ് ബ്രിഡ്ജിന്റെ തകര്ച്ചയെ തുടര്ന്ന് ഉദ്ഘാടനം മാറ്റുകയായിരുന്നു. നിര്മ്മാണത്തില് വരുത്തിയ തട്ടിക്കൂട്ടലാണ് അപകടത്തിന് വഴിയൊരുക്കിയതെന്ന് ആരോപണം ഉയര്ന്നിട്ടുണ്ട്. കരിക്കകത്ത് നിര്മ്മിച്ച ഉയര്ന്നുപൊങ്ങുന്ന പാലം ഉദ്ഘാടന ദിവസംപോലും ഉയര്ത്താത്തതും ദുരൂഹത ഉയര്ത്തിയിരുന്നു.
ജില്ലാ ടൂറിസം പ്രൊമോഷന് കൗണ്സിലും വട്ടിയൂര്ക്കാവ് യൂത്ത് ബ്രിഗേഡ് എന്റര്പ്രണേഴ്സ് കോഓപ്പറേറ്റീവ് സൊസൈറ്റിയ്ക്കുമാണ് പാര്ക്കിന്റെ നടത്തിപ്പും പരിപാലനവും. വട്ടിയൂര്ക്കാവ് എംഎല്എ പ്രശാന്തിന്റെ നേതൃത്വത്തില് ഡിവൈഎഫ്ഐക്കാരുടേതാണ് സൊസൈറ്റി. സര്ക്കാര് കരാറുകളില് ഇടനില നിന്ന് പണം തട്ടുകയാണ് സൊസൈറ്റി എന്ന വ്യാപക ആക്ഷേപം നിലനില്ക്കുമ്പോഴാണ് നിര്മ്മിച്ച പാലം തകര്ന്നത്. ടൂറിസം വകുപ്പ് പദ്ധതി ആവിഷ്കരിച്ച് നിര്മ്മാണ അനുമതി നല്കി ഡിറ്റിപിസിക്ക് കൈമാറി. ഡിറ്റിപിസി സൊസൈറ്റിയേയും ഒപ്പം കൂട്ടി വകുപ്പ് മന്ത്രിയുടെ ഇഷ്ടക്കാരന് കരാര് നല്കുകയാണുണ്ടായത്.
നടത്തിപ്പ് വരവിന്റെ 50 ശതമാനം നടത്തിപ്പ് കാരനും ബാക്കിയുള്ള 50 ശതമാനത്തില് 25 ശതമാനം വീതം സൊസൈറ്റിയും ഡിടിപിസിയും പങ്കിടുന്നതാണ് പാലത്തിന്റെ നടത്തിപ്പ് വ്യവസ്ഥയായി പറയുന്നത്. വലിയ രീതിയില് പാര്ട്ടിക്കാര്ക്ക് ജോലി ചെയ്യാതെ വരുമാനം തട്ടാനുള്ള പദ്ധതിയാണ് വകുപ്പ് മന്ത്രി ടൂറിസം മേഖലയില് ആവിഷ്കരിച്ചതെന്നാണ് ആക്ഷേപം. സംസ്ഥാനമൊട്ടാകെ ജില്ലാ അടിസ്ഥാനത്തില് പല രൂപത്തിലും ഭാവത്തിലും പദ്ധതികള് നടത്തിയിട്ടുണ്ട്.
സിറ്റിപിസിയുടെ തലപ്പത്ത് ഇഷ്ടക്കാരായ ഡിവൈഎഫ്ഐ ക്കാരെ സെക്രട്ടറിയായി നിയോഗിച്ചുകൊണ്ടാണ് ഇത്തരത്തിലുള്ള പദ്ധതികള് നടപ്പിലാക്കിയതെന്നും ആരോപണമുണ്ട്. ആക്കുളം കണ്ണാടി പാലം പദ്ധതിയില് ഡിറ്റിപിസി മുന് സെക്രട്ടറിയുടെ നേതൃത്വത്തിലാണ് കാര്യങ്ങള് നീക്കിയിട്ടുള്ളതെന്ന ആരോപണവും ശക്തമാണ്. കടലില് നിര്മ്മിച്ച ഫ്ളോട്ടിങ് ബ്രിഡ്ജുകള് തകര്ന്നതും വലിയ അഴിമതിയെ തുടര്ന്നാണെന്ന് ആരോപണം നിലനില്കെയാണ് ഉദ്ഘാടനത്തിന് മുന്നേ കണ്ണാടി പാലവും തകര്ന്നത്.
