തിരുവനന്തപുരം: ഡ്രൈവിംങ് ടെസ്റ്റ് രീതി പരിഷ്‌കരിക്കണമെന്ന് ഗതാഗത മന്ത്രി കെ.ബി. ഗണേഷ്‌കുമാര്‍ ഉറച്ച നിലപാടെടുത്തതോടെ പരിഷ്‌കരണവുമായി മോട്ടോര്‍ വാഹന വകുപ്പ് മുന്നോട്ട്. മെയ് മുതല്‍ പുതിയ രീതിയില്‍ ടെസ്റ്റ് നടത്തണമെന്ന നിര്‍ദേശം ഓഫീസ് മേധാവിമാര്‍ക്ക് നല്‍കിക്കൊണ്ട് ഉത്തരവിറങ്ങി.
എന്നാല്‍ പുതിയ രീതിയില്‍ ടെസ്റ്റ് നടത്തുന്നതിനുള്ള സ്ഥലമൊരുക്കുന്നതിനാവശ്യമായ തുക ഒരിടത്തും അനുവദിച്ചിട്ടില്ല. വകുപ്പിന്റെ അധീനതയിലുള്ള എട്ട് ഓട്ടോമേറ്റഡ് ടെസ്റ്റിങ് ട്രാക്കുകള്‍ പോലും പൂര്‍ണസജ്ജമായിട്ടില്ല. ഉത്തരവ് ഇറക്കിയെങ്കിലും അടിസ്ഥാന സൗകര്യങ്ങളില്ലാത്തതിനാല്‍ ഡ്രൈവിങ് ടെസ്റ്റ് പരിഷ്‌കരണം ഉടന്‍ നടപ്പാകില്ല.
ടെസ്റ്റിങ് ഗ്രൗണ്ട് ഉള്‍പ്പെടെയുള്ള അടിസ്ഥാനസൗകര്യങ്ങളൊന്നും ഒരുക്കാന്‍ കഴിഞ്ഞില്ലെങ്കിലും ഡ്രൈവിങ് ടെസ്റ്റ് പരിഷ്‌കരണവുമായി മുന്നോട്ട് പോകാന്‍ തന്നെയാണ് മോട്ടോര്‍വാഹന വകുപ്പിന്റെ തീരുമാനം. മന്ത്രിയുടെ നിര്‍ദേശപ്രകാരം 77 ഓഫീസുകളില്‍ ടെസ്റ്റിനു സ്ഥലമൊരുക്കാന്‍ ഉദ്യോഗസ്ഥര്‍ പദ്ധതി തയ്യാറാക്കിയിരുന്നുവെങ്കിലും തുക അനുവദിക്കാത്തതിനാല്‍ അടിസ്ഥാന സൗകര്യങ്ങള്‍ പോലും തയ്യാറായിട്ടില്ല. ഇതിനിടെയാണ് മെയ് മുതല്‍ റിവേഴ്‌സ് പാര്‍ക്കിങ്ങും ഗ്രേഡിയന്റ് പരീക്ഷണവും ഉള്‍പ്പെടെ ഡ്രൈവിങ് ടെസ്റ്റ് കര്‍ശനമാക്കാന്‍ നിര്‍ദേശം നല്‍കിയിട്ടുള്ളത്.
ഡ്രൈവിങ് ടെസ്റ്റുകളുടെ എണ്ണം കുറയ്‌ക്കുക മാത്രമാണ് സാധ്യമായിട്ടുള്ളത്. ദിവസം 20 പുതിയ അപേക്ഷകരെയും പത്ത് പരാജയപ്പെട്ടവരെയും ഉള്‍പ്പടെ 30 പേരെ മാത്രമാകും ഡ്രൈവിങ് ടെസ്റ്റിന് പങ്കെടുപ്പിക്കുക. എണ്ണം കുറയ്‌ക്കുന്നതോടെ ഡ്രൈവിങ് ലൈസന്‍സിനുള്ള കാത്തിരിപ്പും നീളും. ടെസ്റ്റിന്റെ എണ്ണം കുറച്ചതോടെ മുന്‍കൂട്ടി അനുവദിച്ച തീയതി റദ്ദാക്കുകയും ചെയ്തു.
ഇതിനെ തുടര്‍ന്നു ഡ്രൈവിങ് ടെസ്റ്റ് അനിശ്ചിതത്വത്തിലായ അപേക്ഷകര്‍ പ്രതിസന്ധിയിലായി. കേരളത്തിനു പുറത്തു ജോലിക്കും പഠിക്കാനും പോകേണ്ടവര്‍ ഉള്‍പ്പെടെ ഒട്ടേറെ പേരാണ് അനുവദിക്കപ്പെട്ട തീയതി റദ്ദാക്കപ്പെട്ടതോടെ വിഷമസ്ഥിതിയിലായത്. ദിവസങ്ങള്‍ ശ്രമിച്ച ശേഷമാണ് തീയതി കിട്ടിയതെന്നും അതു റദ്ദാക്കിയതു ന്യായമല്ലെന്നും നേരത്തെ ലഭിച്ച തീയതി പുനഃസ്ഥാപിച്ചു ഡ്രൈവിങ് ടെസ്റ്റ് നടത്തണമെന്നുമാവശ്യപ്പെട്ടുകൊണ്ട് അപേക്ഷകര്‍ പലയിടത്തും ആര്‍ടിഒയെ സമീപിക്കുന്നുണ്ട്. എന്നാല്‍ സംസ്ഥാന തലത്തില്‍ നടപ്പാക്കിയ പരിഷ്‌കാരമായതിനാല്‍ ആര്‍ടിഒമാര്‍ക്ക് തീരുമാനമെടുക്കാനാകില്ല. അപേക്ഷകരുടെ പരാതി മുകളിലേക്ക് അറിയിക്കാമെന്ന് പറഞ്ഞാണ് പലയിടത്തും അപേക്ഷകരെ തിരിച്ചയയ്‌ക്കുന്നത്.
അതേസമയം ദിവസം 100ല്‍ അധികം ഡ്രൈവിങ് ടെസ്റ്റ് നടത്തിയ 15 ഉദ്യോഗസ്ഥരെക്കൊണ്ട് തിങ്കളാഴ്ച തിരുവനന്തപുരം മുട്ടത്തറയിലെ ഡ്രൈവര്‍ ടെസ്റ്റിങ് കേന്ദ്രത്തില്‍ ഡ്രൈവിങ് ടെസ്റ്റ് പരീക്ഷണം നടത്തും. തെരഞ്ഞെടുപ്പിന് മുമ്പ് ഇത് നടത്താനാണ് തീരുമാനിച്ചിരുന്നതെങ്കിലും തിരിച്ചടിയാകുമെന്ന് കണ്ട് തീരുമാനം നീട്ടിവയ്‌ക്കുകയായിരുന്നു. മന്ത്രിയുടെ നിര്‍ദേശപ്രകാരം ഇവരെക്കൊണ്ട് ഡ്രൈവിങ് ടെസ്റ്റ് നടത്തിക്കുകയും മേലുദ്യോഗസ്ഥര്‍ നിരീക്ഷിക്കുകയും ചെയ്യും. ട്രാന്‍സ്‌പോര്‍ട്ട് കമ്മീഷണറുടെ നിര്‍ദേശങ്ങള്‍ പാലിച്ചുകൊണ്ട് നിശ്ചിത സമയത്തിനുള്ളില്‍ 100 ഡ്രൈവിങ് ടെസ്റ്റ് നടത്താന്‍ കഴിയുമോ എന്നാണ് പരിശോധിക്കുന്നത്.
പ്രതികരിക്കാൻ ഇവിടെ എഴുതുക: