അവസാന വോട്ടും ഉറപ്പിച്ച് രാജീവ് ചന്ദ്രശേഖർ

തിരുവനന്തപുരം: പ്രചാരണത്തിന്റെ അവസാന നാളിൽ നഗരത്തിലെ ഇടറോഡുകളിൽ ഒരുവട്ടംകൂടി ജനങ്ങളെ നേരിൽ കണ്ട് വോട്ടുറപ്പിച്ച് എൻഡിഎ സ്ഥാനാർത്ഥി രാജീവ് ചന്ദ്രശേഖർ. ഒന്നരമാസത്തെ ചൂടുപിടിച്ച പ്രചരണത്തിന് നാന്ദി കുറിച്ച് നടന്ന കൊട്ടികലാശം കൊട്ടി കയറുമ്പോൾ ഇന്ദ്രപ്രസ്തത്തിൽ ഭരണമുറപ്പിച്ച എൻഡിഎയും ആവേശത്തിലാണ്.സ്ഥാനാർത്ഥിയുടെ വാഹനപര്യടന ജാഥ രാവിലെ ആറ്റുകാൽ മണ്ഡലത്തിലെ കാലടി ജംഗ്ഷനിൽ നിന്ന് ആരംഭിച്ചു. കൗൺസിലർമാരായ കരമന അജിത്മഞ്ചു ജി.എസ്, ശിവകുമാർ തുടങ്ങിയവർ സ്ഥാനാർത്ഥിയോടപ്പം അനുഗമിച്ചു.

നെടുങ്കാട് മുത്താരമ്മൻ ദേവീക്ഷേത്ര നടയിലെത്തിയ സ്ഥാനാർത്ഥിയെ പുഷ്പവൃഷിയോടെ ജനം സ്വീകരിച്ചു. ബൈക്ക് റാലിയുടെ അകമ്പടിയോടെ നെടുങ്കാട് ഇലങ്കം റോഡിലേക്ക് എത്തിയ സ്ഥാനാർത്ഥി രാജീവ് ചന്ദ്രശേഖറിന് പെട്ടിക്കട നടത്തുന്ന 72കാരി ടി. സരോജിനി അമ്മ ഷാൾ അണിയിച്ച് സ്വീകരിച്ചു. തളിയൽ, അരശുമൂട് മാടൻ തമ്പുരാൻ ക്ഷേത്രം വഴി മരുതൂർക്കടവ്, ചെട്ടിയാർമുക്ക്, കാലടി സൗത്ത്, താമരം എന്നിവിടങ്ങളിലെത്തിയ സ്ഥാനാർത്ഥിയെ പൂത്തിരികത്തിച്ചും പൂമാല ചാർത്തിയും തലപാവും കിരീടവും നൽകിയാണ് സ്ഥാനാർത്ഥിയെ സ്വീകരിച്ചു.റോഡിനിരുവശവും സ്ത്രീകളും കുട്ടികളും സ്ഥാനാർത്ഥിയെ കൈവീശി കാണിച്ച് വിജയാംശസകൾ നേർന്നു.