കോഴിക്കോട് : വടകരയിലെ എല്‍ഡിഎഫ് സ്ഥാനാര്‍ഥി കെ.കെ. ശൈലജയ്ക്ക് യുഡിഎഫ് സ്ഥാനാര്‍ഥി ഷാഫി പറമ്പില്‍ വക്കീല്‍ നോട്ടീസ് അയച്ചു. തന്റെ സല്‍പ്പേരിന് കളങ്കമുണ്ടാക്കുന്നതിനും രാഷ്‌ട്രീയ നേട്ടത്തിനും വേണ്ടി ആരോപണം ഉന്നയിക്കുകയാണെന്ന് നോട്ടീസില്‍ ചൂണ്ടിക്കാട്ടുന്നു.
ചെയ്യാത്ത കാര്യം സാമൂഹ്യ മാധ്യമങ്ങളിലൂടെ പ്രചരിപ്പിച്ചുവെന്നാണ് ഷാഫി പറമ്പില്‍ നോട്ടീസില്‍ പറയുന്നത്. 24 മണിക്കൂറിനകം വാര്‍ത്താസമ്മേളനം വിളിച്ച് ആരോപണങ്ങള്‍ പിന്‍വലിച്ച് മാപ്പു പറഞ്ഞില്ലെങ്കില്‍ നിയമ നടപടികളുമായി മുന്നോട്ടു പോകുമെന്നാണ് ഷാഫി വ്യക്തമാക്കിയത്.
താനും പാര്‍ട്ടി പ്രവര്‍ത്തകരും കെ കെ ശൈലജയുടെ മോര്‍ഫ് ചെയ്ത ചിത്രങ്ങള്‍ വച്ച് അശ്ലീല വിഡിയോകള്‍ പ്രചരിപ്പിക്കുന്നെന്നാണ് ശൈലജ പത്രസമ്മേളനത്തില്‍ ആരോപിച്ചതെന്ന് ഷാഫി വക്കീല്‍ നോട്ടിസില്‍ പറയുന്നു.
പാനൂര്‍ ബോംബ് സ്ഫോടനം, പിപിഇ കിറ്റ് അഴിമതി എന്നിവയില്‍ നിന്ന് ശ്രദ്ധ തിരിക്കാനുള്ള ശ്രമമാണ് ശൈലജയുടെ ആരോപണത്തിന് പിന്നില്‍ എന്നും വക്കീല്‍ നോട്ടീസില്‍ ചൂണ്ടിക്കാട്ടുന്നുണ്ട്.
തന്റെ പ്രായമായ മാതാവിന് നേരെയും സിപിഎം പ്രവര്‍ത്തകര്‍ സൈബര്‍ ആക്രമണം നടത്തുന്നുണ്ട്.അശ്ലീല വിഡിയോ ഉണ്ടെന്ന് പറഞ്ഞിട്ടില്ലെന്ന് പിന്നീട് നടത്തിയ വാര്‍ത്താസമ്മേളനത്തിലെ ശൈലജയുടെ വാദം ശരിയല്ലെന്നും ഷാഫി പറയുന്നു.
പ്രതികരിക്കാൻ ഇവിടെ എഴുതുക: