അമരാവതി: രാജ്യത്ത് ലോക്സഭാ തെരഞ്ഞെടുപ്പ് പുരോഗമിക്കുമ്പോള്, ആന്ധ്രാപ്രദേശില് നിയമസഭാ തെരഞ്ഞെടുപ്പിനുള്ള ഒരുക്കങ്ങള് തകൃതിയായി നടക്കുകയാണ്. സ്ഥാനാര്ത്ഥികള് നാമനിര്ദ്ദേശ പത്രിക സമര്പ്പിക്കുന്നതും തുടരുകയാണ്. പ്രശസ്ത തെലുങ്ക് സിനിമാ നടനും ഹിന്ദുപൂര് തെലുങ്കുദേശം പാര്ട്ടി എംഎല്എയുമായ നന്ദമുരി ബാലകൃഷ്ണ വീണ്ടും ഇതേ മണ്ഡലത്തില് മത്സരിക്കുകയാണ്.
നേരത്തെ രണ്ട് തവണ അദേഹം ഈ മണ്ഡലത്തില് നിന്ന് വിജയിച്ചിട്ടുണ്ട്. നന്ദമുരി ബാലകൃഷ്ണ, ഭാര്യ വസുന്ധര, മുതിര്ന്ന പാര്ട്ടി നേതാക്കള് എന്നിവര്ക്കൊപ്പമാണ് റാലിക്കൊപ്പം റവന്യൂ ഡിവിഷണല് ഓഫീസിലെത്തിയത്. ടിഡിപി, ജെഎസ്പി, ബിജെപി എന്നീ പാര്ട്ടികളില് നിന്നുള്ള അനുയായികള് പരിപാടിയില് പങ്കെടുത്തു.
നടന്റെ ആരാധകരും പാര്ട്ടി അംഗങ്ങളും ആവേശത്തോടെ ‘ജയ് ബാലയ്യ’ എന്ന മുദ്രാവാക്യം മുഴക്കി. റാലിക്ക് മുന്നോടിയായി നന്ദമുരി ബാലകൃഷ്ണയും ഭാര്യയും അടുത്തുള്ള സുഗുരു ആഞ്ജനേയ സ്വാമി ക്ഷേത്രത്തില് പ്രത്യേക പൂജ നടത്തി. തെരഞ്ഞെടുപ്പ് സത്യവാങ്മൂലത്തിലാണ് നന്ദമുരി ബാലകൃഷ്ണ തന്റെ സ്വത്തും കടവും വെളിപ്പെടുത്തിയത്. അവരുടെ സ്വത്തുക്കളുടെ അടിസ്ഥാനത്തില്, ബാലയ്യയുടെ ആസ്തി 81.63 കോടി രൂപയും ഭാര്യ വസുന്ധരയുടെ ആസ്തി ഏകദേശം 140 കോടി രൂപയുമാണ്.
