വിതുര: വീട്ടില് ആയുധ നിര്മാണം നടക്കുന്നതായി ജില്ലാ പോലീസ് മേധാവിക്ക് വിവരം ലഭിച്ചതിനെ തുടര്ന്ന് പരിശോധന നടത്തിയ ഡാന്സാഫ് ടീമും പോലീസും കണ്ടത് മാരകായുധങ്ങളും മാന്കൊമ്പും. ഇവയ്ക്കു പുറമെ ആയുധങ്ങള് നിര്മിക്കുന്നതിനുള്ള ഉപകരണങ്ങളും എയര്ഗണ്ണുമായി പിടികൂടിയത് നിരവധി കേസുകളിലെ പ്രതിയെ. വിതുര ആനപ്പാറ ചിറ്റാര് നാസ് കോട്ടേജില് ചിറ്റാര് ഷഫീഖ് എന്ന് അറിയപ്പെടുന്ന ഷഫീഖ് (35) ആണ് അറസ്റ്റിലായത്.
ഇയാളുടെ വീട്ടില് ആയുധനിര്മാണം നടക്കുന്നതായി ജില്ലാ പോലീസ് മേധാവി കിരണ് നാരായണന് കിട്ടിയ രഹസ്യ വിവരത്തിന്റെ അടിസ്ഥാനത്തില് ഡാന്സാഫ് ടീം നടത്തിയ അന്വേഷണത്തിലാണ് പ്രതിയെ പിടികൂടിയത്. വിതുര കല്ലാര് മേഖലകളിലെ പതിവു കുറ്റവാളിയായ ഇയാള് ജില്ലയിലെ വിവിധ സ്റ്റേഷനുകളിലായി വധശ്രമം, മയക്കുമരുന്ന് കച്ചവടം ഉള്പ്പെടെയുള്ള നിരവധി ക്രിമിനല് കേസുകളിലെ പ്രതിയാണെന്ന് പോലീസ് പറഞ്ഞു. അടുത്തിടെ വിതുരയില് കാര് അടിച്ചു തകര്ത്ത കേസിലും വീട്ടില് ബോംബ് എറിഞ്ഞ കേസിലുമായി ജയില് ശിക്ഷ അനുഭവിച്ച ഷഫീക് രണ്ട് മാസം മുന്പാണ് പുറത്തിറങ്ങിയത്.
ജില്ലാ പോലീസ് മേധാവിക്ക് ലഭിച്ച വിവരത്തെ തുടര്ന്ന് കുറച്ച് ദിവസമായി ഇയാളുടെ വീടും പരിസരവും ഡാന്സാഫ് ടീം നിരീക്ഷിച്ചു വരികയായിരുന്നു. വലിയമല ഇന്സ്പെക്ടര് ശിവകുമാറിന്റെ നേതൃത്വത്തില് ഷഫീഖിന്റെ വീട് വളഞ്ഞ് കഴിഞ്ഞ ദിവസം നടത്തിയ റെയ്ഡില് ഇരുനില വീടിന്റെ മുകളിലത്തെ ഒരു മുറി ആയുധ നിര്മാണത്തിനായി ഉപയോഗിക്കുന്നതായി കണ്ടെത്തി.
ഏറു പടക്കങ്ങള്, വെടി മരുന്ന്, വിവിധ തരം മാരകയുധങ്ങള്, എയര്ഗണ് എന്നിവ കൂടാതെ മാന്കൊമ്പും ഇവിടെ നിന്ന് കണ്ടെടുത്തു. ഏറു പടക്കങ്ങളും ആയുധങ്ങളും ഷഫീഖ് തന്നെയാണ് നിര്മിച്ചിരുന്നത്. ഇവ നിര്മിക്കാനുള്ള കട്ടറുകളും െ്രെഗന്റിങ്ങ് മെഷീനും ഉള്പ്പടെ മുറിയില് സൂക്ഷിച്ചിരുന്നു. മാന്കൊമ്പ് കണ്ടെടുത്തതിനെ തുടര്ന്ന് വനം വകുപ്പ് കേസ് രജിസ്റ്റര് ചെയ്ത് ഇയാളെ കസ്റ്റഡിയില് വാങ്ങി.
മാന്കൊമ്പിന്റെ ഉറവിടം കണ്ടെത്തിയ ശേഷം മുമ്പും ഇയാള് മൃഗങ്ങളെ വേട്ടയാടിയിട്ടുണ്ടോ എന്ന അന്വേഷണം നടത്താനാണ് വനം വകുപ്പിന്റെ തീരുമാനം. വലിയമല ഇന്സ്പെക്ടര് ശിവകുമാര്, ഡാന്സാഫ് സബ് ഇന്സ്പെക്ടര് ഷിബു, എസ്സിപിഒ മാരായ സതികുമാര്, അനൂപ്, ഉമേഷ്ബാബു, വിതുര എസ്ഐ വി.സതികുമാര്, എസ്സിപിഒ ബിനു എന്നിവര് അടങ്ങുന്ന സംഘമാണ് റെയ്ഡ് നടത്തിയത്.
