ന്യൂദല്ഹി: ദല്ഹി മദ്യനയ അഴിമതിക്കേസില് മുന് ഉപമുഖ്യമന്ത്രി മനീഷ് സിസോദിയയുടെ ജാമ്യ ഹര്ജി പരിഗണിക്കുന്നത് കോടതി ഏപ്രില് 30ലേക്ക് മാറ്റി. ദല്ഹി റോസ് അവന്യൂ കോടതിയാണ് സിസോദിയയുടെ ജാമ്യ ഹര്ജി വിധി പറയാന് മാറ്റിയത്. കേന്ദ്ര അന്വേഷണ ഏജന്സികളുടെയും സിസോദിയക്ക് വേണ്ടി ഹാജരായ അഭിഭാഷകരുടെയും വാദം കേട്ട ശേഷം പ്രത്യേക ജഡ്ജി കാവേരി ബവേജയാണ് ഹര്ജി മാറ്റിവെക്കുന്നതായി ഉത്തരവിട്ടത്.
സുപ്രീം കോടതിയിലുള്പ്പെടെ സിസോദിയക്ക് ജാമ്യം നിഷേധിച്ചിരുന്നതാണെന്ന് നിലവിലെ ജാമ്യഹര്ജിയെ എതിര്ത്ത് സിബിഐ കോടതിയില് ചൂണ്ടിക്കാട്ടി. മനീഷ് സിസോദിയ രാഷ്ട്രീയ സ്വാധീനമുള്ള നേതാവാണ്. അങ്ങനെയൊരാള്ക്ക് ജാമ്യം നല്കുന്നത് തെളിവുകള് നശിപ്പിക്കുന്നതിനും അന്വേഷണം തടസപ്പെടുന്നതിനും കാരണമാകും. അന്വേഷണം നിര്ണായക ഘട്ടത്തിലാണെന്നും അന്വേഷണ ഏജന്സി വ്യക്തമാക്കി. 2023 ഫെബ്രുവരി 26നാണ് സിബിഐ മനീഷ് സിസോദിയയെ അറസ്റ്റ് ചെയ്തത്. ഇതുമായി ബന്ധപ്പെട്ട കള്ളപ്പണം വെളുപ്പിക്കല് കേസില് ഇ ഡിയും സിസോദിയയുടെ അറസ്റ്റ് രേഖപ്പെടുത്തിയിരുന്നു.
