തിരുവനന്തപുരം: സംസ്ഥാനത്തെ 20 മണ്ഡലങ്ങളിലേക്കുള്ള ലോക്സഭാ തെരഞ്ഞെടുപ്പിന് ആറ് നാള് മാത്രം അവശേഷിക്കെ സമ്മതിദാനത്തിന്റെ അടയാളമായി പുരട്ടാനുള്ള മായാത്ത മഷി (ഇന്ഡെലിബിള് ഇങ്ക്) സംസ്ഥാനത്തെ മുഴുവന് വിതരണ കേന്ദ്രങ്ങളിലും എത്തി. 63,100 കുപ്പി (വയല്) മഷിയാണ് സംസ്ഥാനത്ത് ഉപയോഗിക്കുന്നതെന്ന് മുഖ്യതെരഞ്ഞെടുപ്പ് ഓഫീസര് സഞ്ജയ് കൗള് പറഞ്ഞു.
സംസ്ഥാനത്തെ 25,231 ബൂത്തുകളിലേക്ക് ആവശ്യമുള്ളതിന്റെ രണ്ടര ഇരട്ടി മഷിക്കുപ്പികളാണ് എത്തിച്ചിട്ടുള്ളത്. ഒരു കോടി 30 ലക്ഷത്തോളം രൂപ ചെലവഴിച്ചാണ് സംസ്ഥാനത്തേക്കാവശ്യമായ മഷി കര്ണാടക സര്ക്കാരിന്റെ ഉടമസ്ഥതയിലുള്ള മൈസൂരു പെയ്ന്റ് ആന്ഡ് വാര്ണിഷ് കമ്പനിയില് (എംവിപിഎല്) നിന്ന് എത്തിച്ചത്. ഒരു കുപ്പിയില് പത്തുമില്ലി മഷിയാണുള്ളത്. ഇത് 700 ഓളം വോട്ടര്മാരുടെ വിരലുകളില് പുരട്ടാനാവും.
ഭാരതത്തില് ഈ മഷി നിര്മിക്കാന് അനുവാദമുള്ളത് മൈസൂരു പെയ്ന്റ് ആന്ഡ് വാര്ണിഷ് കമ്പനിക്ക് മാത്രമാണ്. 1962 ലെ ലോക്സഭ തെരഞ്ഞെടുപ്പിലാണ് ആദ്യമായി മായാത്ത മഷി പുരട്ടുന്ന രീതി തുടങ്ങുന്നത്. അതിനു ശേഷം നടന്ന എല്ലാ തെരഞ്ഞെടുപ്പുകളിലും ഈ മഷി വോട്ടര്മാരുടെ വിരലുകളില് പുരട്ടിയിട്ടുണ്ട്. നാഷണല് ഫിസിക്കല് ലബോറട്ടറി ഓഫ് ഇന്ത്യയില് വികസിപ്പിച്ച ഒരു ഫോര്മുലയാണ് ഈ മഷിയില് ഉപയോഗിച്ചിട്ടുള്ളത്. വിരലില് പുരട്ടിയാല് നാല്പതു സെക്കന്റുകൊണ്ട് ഉണങ്ങിത്തീരുന്ന ഈ മഷി മായ്ക്കാനാവില്ല.
