മലപ്പുറം: ഇതര സമുദായങ്ങളെപ്പോലെ സംഘടിത ശക്തിയാവാത്തതാണ് സമുദായത്തിന്റെ പിന്നാക്കാവസ്ഥയ്ക്ക് കാരണമെന്ന് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് പറഞ്ഞു.
മറ്റു പല സഹോദര സമുദായങ്ങളും സംഘടിത ശക്തിയായ വിലപേശി വിദ്യാഭ്യാസ സ്ഥാപനങ്ങളും മറ്റു സര്ക്കാര് ആനുകൂല്യങ്ങളും കൈവശപ്പെടുത്തുമ്പോള് ഈഴവ, തിയ്യ സമുദായം നോക്കുകുത്തികളായി മാറുന്നു.
ഇതര സമുദായങ്ങള് ഉന്നത വിദ്യാഭ്യാസത്തിന്റെയും നൂതന സാങ്കേതിക വിദ്യയുടെയും പിറകേ ഓടുമ്പോള് ബന്ധുജനങ്ങളുടെ സംസ്കാര ചടങ്ങുകള് നടത്തുന്നതിന് ശ്മശാന ഭൂമി അനുവദിച്ചു കിട്ടുന്നതിനു വേണ്ടി മുറവിളി കൂട്ടേണ്ട അവസ്ഥയിലാണ് ഈ സമുദായമെന്നും സംഘടിത ശക്തിയായി മാറുക മാത്രമാണ് ഈ ദുരവസ്ഥയ്ക്ക് പരിഹാരമെന്നും അദ്ദേഹം പറഞ്ഞു.
മലപ്പുറം എസ്എന്ഡിപി യൂണിയന് എടയൂര് പഞ്ചായത്തിലെ വടക്കുംപുറത്ത് സംഘടിപ്പിച്ച ശ്രീനാരായണ സംഗമത്തോട് അനുബന്ധിച്ചുള്ള പൊതുസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മലപ്പുറം യൂണിയന് പ്രസിഡന്റ് ദാസന് കോട്ടക്കല് അധ്യക്ഷനായി. യൂണിയന് സെക്രട്ടറി സുബ്രഹ്മണ്യന് ചുങ്കപ്പള്ളി, തിരൂര് യൂണിയന് പ്രസിഡന്റ് കെ.ആര്. ബാലന്, യോഗം ഡയറക്ടര്മാരായ പ്രദീപ് കുമാര് ചുങ്കപ്പള്ളി, നാരായണന് നല്ലാട്ട്, ഹരിദാസന് പി.കെ., സുനില് പട്ടാണത്ത്, ഗീത വില്ലോടി, വത്സല പി.
കെ., ജിതിന്ദ്രന് മണ്ണില്തൊടി തുടങ്ങിയവര് സംസാരിച്ചു.
