തദ്ദേശീയരായ ജനങ്ങളെ രക്ഷിക്കാൻ വോട്ട് കൃത്യമായി ചെയ്യണമെന്ന് മണിപ്പൂർ മുഖ്യമന്ത്രി

ഇംഫാൽ: സംസ്ഥാനത്തെ തദ്ദേശീയരായ ജനങ്ങളെ രക്ഷിക്കാനും പ്രാദേശിക അഖണ്ഡത സംരക്ഷിക്കാനും വോട്ട് ചെയ്യണമെന്ന് ജനങ്ങളോട് അഭ്യർത്ഥിച്ച് മണിപ്പൂർ മുഖ്യമന്ത്രി എൻ. ബിരേൻ സിംഗ്. ലുവാങ്‌ സംഗ്‌ബാമിൽ വോട്ട് രേഖപ്പെടുത്തിയ ശേഷം മാമാങ് ലെയ്‌കായി സിംഗ് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

“ഇന്നറിന് വേണ്ടി ബി.ജെ.പിയുടെ ബസന്ത സിംഗും ഔട്ടർ മണിപ്പൂരിലെ എൻപിഎഫിന്റെ കെ.തിമോത്തി സിമിയും തീർച്ചയായും വിജയിക്കുകയും കേന്ദ്രത്തിൽ ബിജെപി നേതൃത്വത്തിലുള്ള എൻഡിഎ സർക്കാർ രൂപീകരിക്കാൻ പിന്തുണയ്‌ക്കുകയും ചെയ്യുമെന്ന് ഞാൻ പ്രതീക്ഷിക്കുന്നു. മണിപ്പൂരിലെ ജനങ്ങളോട് വോട്ട് ചെയ്യാനും സംസ്ഥാനത്തെ തദ്ദേശീയരെ രക്ഷിക്കാനും സംസ്ഥാനത്തിന്റെ അഖണ്ഡത സംരക്ഷിക്കാനും എത്രയും വേഗം സമാധാനം കൊണ്ടുവരാനും ഞാൻ അഭ്യർത്ഥിക്കുന്നു,” – സിംഗ് പറഞ്ഞു.

140 കോടി ഇന്ത്യക്കാരുടെ ആദ്യഘട്ട തെരഞ്ഞെടുപ്പു നടന്നതിനാൽ ഇന്ന് ഞാൻ വളരെ സന്തോഷവാനാണ്. മൂന്നാം തവണയും മോദിയെ പ്രധാനമന്ത്രിയാക്കണം. അതിനുള്ള അവസരം എനിക്കുണ്ടായി. സംസ്ഥാനത്തെ എന്റെ സഹോദരീ സഹോദരന്മാർ ബിജെപിക്ക് വോട്ട് ചെയ്യാനും മോദിയെ ശക്തിപ്പെടുത്താനും ശ്രമിക്കുമെന്നാണ് കരുതുന്നതെന്നും അദ്ദേഹം വ്യക്തമാക്കി.

15.44 ലക്ഷത്തിലധികം വോട്ടർമാരിൽ 12.6 ശതമാനം പേർ വെള്ളിയാഴ്ച രാവിലെ 9 മണി വരെ വംശീയ കലാപം രൂക്ഷമായ മണിപ്പൂരിലെ രണ്ട് ലോക്‌സഭാ സീറ്റുകളിലേക്കും തങ്ങളുടെ വോട്ടവകാശം വിനിയോഗിച്ചു.

മണിപ്പൂരിലെ ഇന്നർ മണ്ഡലത്തിൽ 13. 82 ശതമാനം പോളിംഗ് രേഖപ്പെടുത്തിയപ്പോൾ ഔട്ടർ മണിപ്പൂരിൽ 11. 57 ശതമാനം പോളിംഗ് രേഖപ്പെടുത്തി.