കോട്ടയം: ഇസ്രായേലുമായുള്ള സംഘര്‍ഷത്തെ തുടര്‍ന്ന് ഇറാന്‍ പിടിച്ചെടുത്ത ചരക്ക് കപ്പലില്‍ അകപ്പെട്ട കോട്ടയം കൊടുങ്ങൂര്‍ സ്വദേശിനി ആന്‍ ടെസ ജോസഫിന്റെ കുടുംബത്തിന് ആശ്വാസ വാക്കുകളുമായി മുന്‍ രാജ്യസഭ എംപി സുരേഷ് ഗോപിയുടെ ഫോണ്‍ വിളിയെത്തി. എല്ലാ പ്രാര്‍ത്ഥനകളും കൂടെയുണ്ടാകും, മകള്‍ സുരക്ഷിതയായി ഉടന്‍തന്നെ വീട്ടിലെത്തും, ആശങ്കപ്പെടേണ്ട ഒരു സാഹചര്യവും നിലവിലില്ലെന്നും അദ്ദേഹം കുടുംബത്തെ അറിയിച്ചു.
വിദേശകാര്യ മന്ത്രി എസ്. ജയശങ്കറിന്റെ നേതൃത്വത്തില്‍ കൃത്യമായ ഇടപെടല്‍ ഇക്കാര്യത്തില്‍ ഉണ്ടായിട്ടുണ്ടെന്നും കപ്പലില്‍ അകപ്പെട്ട മുഴുവന്‍ ഭാരതീയരുടെയും മോചനം ഉടന്‍തന്നെ ഉണ്ടാകുമെന്നും സുരേഷ് ഗോപി ആന്‍ ടെസയുടെ അച്ഛനെയും അമ്മയേയും അറിയിച്ചു.
ബുധനാഴ്ച രാവിലെ ആന്‍ ടെസ ജോസഫിന്റെ അച്ഛന്‍ ബിജു എബ്രഹാം, അമ്മ ബീന ബിജു എന്നിവരുമായി ബിജെപി വാഴൂര്‍ പഞ്ചായത്ത് കമ്മിറ്റി പ്രസിഡന്റ് കെ.എസ്. ഹരികുമാറിന്റെ ഫോണില്‍ വിളിച്ചാണ് സംസാരിച്ചത്. ബിജെപി മധ്യമേഖലാ പ്രസിഡന്റ് എന്‍. ഹരിയാണ് സുരേഷ് ഗോപിയുടെ ശ്രദ്ധയില്‍ ഈ വിഷയം എത്തിച്ചത്.
പ്രതികരിക്കാൻ ഇവിടെ എഴുതുക: