പാലക്കാട്: നെല്ലിയാമ്പതിയില് പുലിയെ റോഡില് ചത്ത നിലയില് കണ്ടെത്തി. കൂനംപാലം പോത്തു പാറ റോഡില് തേയില തോട്ടത്തിനോട് ചേര്ന്നുള്ള റോഡരികിലാണ് പുലിയുടെ ജഡം കണ്ടെത്തിയത്. കൂനംപാലം, പോത്തുപാറ പ്രദേശങ്ങള് രണ്ടു കിലോമീറ്റര് വ്യത്യാസത്തില് ജനവാസ മേഖലയാണ്.
ഇന്നലെ പുലര്ച്ചെ 5.30ന് ഇതുവഴി കടന്നുപോയ പാല്വില്പനക്കാരനാണ് പുലി റോഡില് കിടക്കുന്നത് കണ്ടത്. തോട്ടം തൊഴിലാളികള് താമസിക്കുന്ന പാടിക്ക് സമീപമാണ് സംഭവം. പുലിയുടെ ആന്തരികാവയവങ്ങള് പുറത്ത് വന്ന നിലയിലാണ്. ഒരു കൈ ഒടിയുകയും ചെയ്തിട്ടുണ്ട്.
നാട്ടുകാര് വിവരമറിയിച്ചതിനെ തുടര്ന്ന് വനം വകുപ്പ് ഉദ്യോഗസ്ഥര് സ്ഥലത്തെത്തി. രാത്രി റോഡ് കടക്കുന്നതിനിടെ ഇതുവഴി പോയ വാഹനം ഇടിച്ചതാകാമെന്നാണ് പ്രാഥമിക നിഗമനം. ഏതെങ്കിലും വാഹനമിടിച്ചതാണോ അതോ മറ്റേതെങ്കിലും രീതിയില് അപായം സംഭവിച്ചതാണോ എന്നും വ്യക്തമല്ല.
