ന്യൂദല്‍ഹി: ദല്‍ഹി മദ്യനയ അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില്‍ തന്റെ അറസ്റ്റ് ശരിവച്ച ഹൈക്കോടതി ഉത്തരവിനെതിരെ മുഖ്യമന്ത്രി അരവിന്ദ് കേജ്രിവാള്‍ സമര്‍പ്പിച്ച ഹര്‍ജി സുപ്രീംകോടതി തിങ്കളാഴ്ച പരിഗണിക്കും. ജസ്റ്റിസ് സഞ്ജീവ് ഖന്ന, ജസ്റ്റിസ് ദീപങ്കര്‍ ദത്ത എന്നിവരടങ്ങിയ ബെഞ്ചാണ് കേസ് പരിഗണിക്കുക.
അറസ്റ്റിനെ ചോദ്യം ചെയ്ത് കേജ്രിവാള്‍ സമപ്പിച്ച ഹര്‍ജി കഴിഞ്ഞ ചൊവ്വാഴ്ചയാണ് ഹൈക്കോടതി തള്ളിയത്. ബുധനാഴ്ച സുപ്രീംകോടതിയെ സമീപിച്ചെങ്കിലും അന്ന് ഹര്‍ജി പരിഗണിച്ചില്ല. അടിയന്തരമായി ഹര്‍ജി പരിഗണിക്കണമെന്ന് കേജ്രിവാളിന്റെ അഭിഭാഷകന്‍ ആവശ്യപ്പെട്ടെങ്കിലും കോടതി അംഗീകരിച്ചിരുന്നില്ല. വ്യാഴാഴ്ച പെരുന്നാള്‍ അവധിയും വെള്ളിയാഴ്ച പ്രാദേശിക അവധിയുമായിരുന്നു.
ശനി, ഞായര്‍ ദിവസങ്ങളിലെ അവധികൂടി കഴിഞ്ഞ് തിങ്കളാഴ്ചയാണ് അടുത്ത പ്രവര്‍ത്തി ദിവസം. ഇ ഡി അറസ്റ്റ് ചോദ്യംചെയ്തുള്ള കേജ്രിവാളിന്റെ ഹര്‍ജി ദല്‍ഹി ഹൈക്കോടതി ജഡ്ജി ജസ്റ്റിസ് സ്വര്‍ണ്ണകാന്ത ശര്‍മയാണ് തള്ളിയത്. മാര്‍ച്ച് 21ന് അറസ്റ്റിലായ കേജ്രിവാള്‍ ഇപ്പോള്‍ തീഹാര്‍ ജയിലിലാണ്.
പ്രതികരിക്കാൻ ഇവിടെ എഴുതുക: