ന്യൂദല്ഹി: കോടതി ഉത്തരവിനെ തുടര്ന്ന് ദല്ഹി ചീഫ് സെക്രട്ടറി നരേഷ്കുമാറിനെതിരെ പോലീസ് എഫ്ഐആര് രജിസ്റ്റര് ചെയ്തു. നരേഷ്കുമാറിന്റെ കീഴുദ്യോഗസ്ഥന് വൈ.വി.വി.ജെ. രാജശേഖറിനെയും എഫ്ഐആറില് ഉള്പ്പെടുത്തി.
ഉത്തരാഖണ്ഡ് അല്മോറ നഗരത്തിലുള്ള കോടതിയാണ് കേസെടുക്കാന് ഉത്തരവിട്ടത്. പ്ലസന്റ് വാലി ഫൗണ്ടേഷന് എന്ന സംഘടന നല്കിയ പരാതി പരിഗണിക്കവേയാണ് കോടതിയുടെ ഉത്തരവ്. ഉത്തരാഖണ്ഡിലെ ദാധാകട ഗ്രാമത്തില് പ്ലസന്റ് വാലി ഫൗണ്ടേഷന് നടത്തുന്ന സ്കൂളിലേക്ക് അധികാരികള് നാല് പേരെ അയച്ചെന്നും അവര് സംഘടനയുടെ ജോ. സെക്രട്ടറിയുടെ ഓഫീസ് ചേമ്പര് തകര്ത്തെന്നുമാണ് ആരോപണം. കൂടാതെ അധികൃതര് ഉള്പ്പെട്ട അഴിമതിയുടെ തെളിവുകളടങ്ങിയ ഫയലുകളും, രേഖകളും, പെന്ഡ്രൈവുകളും അക്രമികള് കൊണ്ടുപോയെന്നും പരാതിയില് പറയുന്നു.
വിജിലന്സിലും മറ്റു അന്വേഷണ ഏജന്സികള്ക്കും കൊടുത്ത പരാതികള് പിന്വലിക്കണമെന്നാവശ്യപ്പെട്ട് പ്ലസന്റ് വാലി ഫൗണ്ടേഷന്റെ അധികൃതരെ ഭീഷണിപ്പെടുത്തി. നേരത്തേ എഴുതി തയാറാക്കി കൊണ്ടുവന്ന രേഖകളില് ഒപ്പിടാന് പരാതിക്കാരനെ നിര്ബന്ധിച്ചു. പ്രതിരോധിച്ചപ്പോള് മേശവലിപ്പിലുണ്ടായിരുന്ന 63,000 രൂപ മോഷ്ടിച്ചെന്നും പരാതിയില് ആരോപിക്കുന്നു.
അല്മോറയിലെ ചീഫ് ജുഡീഷ്യല് മജിസ്ട്രേറ്റിന്റെ ഉത്തരവിനെ തുടര്ന്ന് ഗോവിന്ദ്പുര് റവന്യൂ പോലീസ് സബ് ഇന്സ്പെക്ടറാണ് കേസ് രജിസ്റ്റര് ചെയ്തത്. ഇന്ത്യന് പീനല് കോഡിലെ 392 (മോഷണം), 447 (അതിക്രമിച്ചു കടക്കല്), 120 ബി (ഗൂഢാലോചന), 504, 506 വകുപ്പുകളും എസ്സി-എസ്ടി നിയമത്തിലെ വകുപ്പുകളും ചേര്ത്താണ് എഫ്ഐആര് രജിസ്റ്റര് ചെയ്തിരിക്കുന്നതെന്നും അല്മോറ ഡിസ്ട്രിക്ട് മജിസ്ട്രേറ്റ് വിനിത് തോമര് പറഞ്ഞു.
